كشفت الفنانة الجميلة يسرا، عن كواليس من حياتها الشخصية، وتحدثت عن العلاقة التى كانت تجمعها بالفنان الراحل سمير غانم وزوجته الراحلة دلال عبدالعزيز، وتحدثت عن سبب ذهابها إلى فرح يوم وفاة سمير غانم.
يسرا عن ذهابها فرح يوم جنازة سمير غانم: «الناس نفسها تشوفلك الغلط»
وأكدت الفنانة، أثناء استضافتها ببرنامج “أنا والقناع”، والتى تقوم بتقديمة الاعلامية منى عبدالوهاب، والذى يُذاع من خلال فضائية “cbc”، وقالت:ـ “أى شخص زعلت عليه زعلت من كل قلبى، وأى شخص فرحتله بجد من كل قلبى، ومفيش حد حزنت عليه قد والدتى، وكل يوم بيعدى علينا بيبقا فيه فرح وميتم ومش هقدر أرضى كل الناس، وهو مش ممكن أكون روحت الفرح علشان أداوى الحزن؟، وأنا ساعتها طلعت من الجنازة وكلمت دلال ومقلتش ليها إنى كنت في الجنازة”.
وتابعت يسرا:ـ “بجد الناس مش فاهمة وفى ناس نفسها تشوفلك الغلط، وأنا على طول كنت بسأل على دلال والجروب بتاعها مُحتفظة بيه لحد دلوقتى، وأنا ساعتها قولتلها إنى خارجة ورايحة فرح،وخبيت عليها إنى رايحة الجونة علشان خايفة عليها”.
وواصلت الفنانة:ـ “اتعلمت من الدنيا إنك عمرك ما هترضى كل الناس، وده سواء عملتى الواجب أو لأ، ويمكن أكون روحت الفرح عشان أنسى الحزن، وكمان العروسة والعريس زى أولادى وعلاقتى بالعائلتين سواء في الفرح أو الحزن مهمة أوى، وحقيقى الراحل سمير حبيب قلبى ومفيش شك في كده”.
وتحدثت الفنانة يسرا خلال اللقاء، عن والدتها الراحلة حيث قالت:ـ “بحمد ربنا إنى مفيش حد خدمها غيرى في فترة مرضها، والحمد لله إن ربنا وفقنى لده وكنت أتمنى إنى أعمل أكتر من كده بكتير، ولو كنت أقدر أعمل أكتر مكنتش هتأخر أبداً، وعمرى ما هنسى لما كانت إلهام شاهين قاعدة معايا وقلتلها إمشى عشان ماما هتموت بكرة وعاوزة أقعد معاها، وبجد مش عارفة إزاى ده حصل”.
