قامت الاعلامية الجميلة ياسمين عز، بإثارة الكثير من الجدل خلال الساعات القليلة الماضية، بعد أن قامت بتوجيه الكثير من النصائح للسيدات، بخصوص طريقة التعامل مع أزواجهن في حال إن كان الزوج في حالة عصبية، ونصحت متابعات برنامجها بإتباع أسلوب معين للإستئذان قبل دخول الحمام.
ياسمين عز للسيدات: «استأذنى جوزك قبل ما تخشى الحمام»
وأكدت الاعلامية، أثناء تقديمها لبرنامجها الشهير “كلام الناس”، والذى يُذاع من خلال فضائية “mbc مصر”، وقالت:ـ “لو إنتى قاعدة جنب جوزك اللى هو فرعونك مينفعش تتنفسى وهو بيتنفس.. عيب أوى”.
وتابعت ياسمين:ـ “وهل معنى الكلام اللى بقوله إنك تكتمى نفسك وتموتى.. ألف بعد الشر عليكى، وياريت تفهمى معنى كلامى كويس، وده بمعنى إنوا لما يكون عصبى وصوت نفسه عالى أوى من شدة العصبية، مينفعش إنك تتنفسى وتنفخى بصوت عالى معاه، لأن الموضوع ده هيزود الشحنة السلبية والنكد، وساعتها هتقوم خناقة بينكم والمشاكل هتزيد، ومش هتعرفى تسيطرى على الأمور”.
وأضافت الاعلامية، موجه نصيحة أخرى للسيدات حيث قالت:ـ “ولو إنتوا قاعدين مع بعض وبتتكلموا وتتسامروا، مش هينفع تقومى وتقطعى كلامه فجأة، وتمشى من غير استئذان وتروحى الحمام، وده علشان أكيد الحمام مش أهم من جوزك يا مدام”.
وأنهت ياسمين نصائحها وقالت:ـ “سهل أوى عليكى تستنى لما يخلص كلامه، ويقوم هو الأول وتقومى إنتى من بعده، ولو إنتى مستعجلة تقولى له بلطف مع ابتسامة خفيفة من غير ما تقطعى كلامه.. حبيبى ممكن بعد إذنك أروح أعمل حاجة، أو هروح أغسل إيدى علشان حاسة إنها محتاجة تتنضف وتتعطر شوية ممكن؟”.
