أثارت الفنانة الجميلة يسرا، الكثير من الجدل خلال الساعات القليلة الماضية، بعد أن أشارت عن أنها لا تشعر بالحزن بسبب عدم انجابها الأطفال، وأنها تحمد ربنا على هذا الأمر.
يسرا: «الحمد لله إنى مخلفتش»
وأكدت الفنانة، أثناء استضافتها ببرنامج “كلام نواعم”، والذى يُذاع من خلال فضائية “mbc1″، وقالت:ـ “وأنا في الثلاثينيات كان عندى هاجس إنى لازم أبقى أُم، وده علشان أنا معطاءة بطبعى كنت هموت وأخلف، وبعد كده حصل إنى فقدت طفلين أثناء جوازتى الأولى، ولما إتجوزت خالد قلتله نخلف وحسيت إنوا مش مبسوط من الموضوع ده وقالى نبقا نشوف”.
وأضافت الفنانة:ـ “وأنا ساعتها قلت مش عاوز يخلف منى، وسألته إنوا كان قلقان إنى أكون أُم مش كويسه، وقالى إنت الست الوحيدة اللى أتمنى أخلف منها، ولكن الزمن اللى هنخلف فيه على بال ما يكبر بعد 20 سنة هتبقى الحياة مختلفة، ومش هيشوفوا اللى إحنا شفناه وحياتهم هتبقى أسرع وسطحية، وبجد مش عاوز أشوف عيالى كده، وأنا بعد فترة إقتنعت وقلت الحمد لله إنى مخلفتش”.
ووجهت يسرا رسالة للسيدات وقالت:ـ “أوعوا تزعلوا من قدر ربنا اللى إدهلكم، ومع الوقت تخطيت الشعور ومع التجارب شفت ناس فقدوا أولادهم ومش قادرين يعيشوا، وكمان شوفت أولاد عاصيين ومش عارفه إيه اللى كان ممكن يحصلى، وبجد مش عارفة إيه اللى كان ممكن يحصلى لو كان عندى إبن ومات، وفى النهاية خالد كل حاجة في حياتى ابنى وجوزى وأخويا وصديقى.. بجد ربنا عوضنى، وبقول للى مخلفتش متزعليش واللى خلفت تحمد ربنا”.
ومن جانبها، فإن الفنانة يسرا تحضر حالياً لمسلسل”حمدلله على السلامة”، والذى من المقرر عرضه في السباق الرمضانى للعام الحالى 2023، وشارك الفنانة البطولة كلاً من “مايان السيد، وعنبة، وشيماء سيف”، والمسلسل من تأليف محمد ذو الفقار ومن إخراج عمرو صلاح.
