كشفت الفنانة الجميلة وفاء مكى، عن كواليس فترة غيابها عن الساحة الفنية خلال الفترة الماضية، وأكدت على أنها تمر حالياً بضائقة مالية بسبب عدم عملها، وأوضحت بأن الأمر ليس عقاب من الله بسبب ما حدث منها مع الخادمتين وتعذيبهما بمنزلها.
وفاء مكى: «اللى بيحصلى مش عقاب من ربنا»
وأكدت الفنانة، أثناء تصريحاتها مع القاهرة 24 وقالت:ـ “ناس كتير بيقولوا اللى بيحصل ليا ده بسبب اللى عملته، طب ماشى وابنى ذنبه إيه اللى ملوش حول ولا قوة عشان يتعاقب، وليه منقولش إن إذا أحب الله عبداً إبتلاه علشان يشوف مدى صبره وتحمله، وكمان قضيتى بقالها 23 سنة وعملت بعدها مسلسلات وبطولات”.
وتابعت الفنانة، وأكدت بأنها ستقوم بالإعتصام أمام نقابة المهن التمثيلية، حتى يتم إيجاد حلاً لأزمتها الحالية، وعلقت:ـ “خدت سلفة من نقابة المهن التمثيلية ومضيت على وصلات أمانة، وكمان عرضت شقتى للبيع وهبقى أعيش في شقة إيجار جديد، وهعمل إعتصام أمام النقابة وهمتنع عن الطعام لحد ما مسؤول يشوف لى حل بطريقة إنسانية ومشرفة”.
وأوضحت وفاء، بأنها برغم ما تمر به حالياً إلا أنها على أتم استعداد للرجوع للساحة الفنية والعمل من جديد بسبب حبها الشديد للفن، وقالت:ـ “وأنا على الرغم من اللى بيحصلى لكنى في النهاية بحب مهنة التمثيل، ولكن للأسف الشديد معملتش حساب للزمن، وحسبى الله ونعم الوكيل في كل اللى جه عليا وظلمنى، وهفضل على طول أعمل إستغاثة وأستغيث بالمسؤلين، وفى النهاية ذنبى في رقبة كل مسؤول”.
وأنهت الفنانة مكى حديثها وقالت:ـ “بجد عاوزة أقف على رجلى من تانى، وأكل لقمتى من عرق جبينى زى الناس ما بتقول، وياريت تشوفوا أنا كنت إيه، ومش محتاجة برموا لأى حاجة، ومش هينفع أنزل دون المستوى”.
