“الناس اللى بتتريق عليا.. كرشى مرض مش عز الشهرة”.. تصريحات حمو بيكا تثير الجدل ببرنامج حبر سرى

أثار مؤدى المهرجانات الشهير بـ حمو بيكا الكثير من الجدل، وذلك بعد أن كشف عن تفاصيل المرض الذى أُصيب به وتكاليف العلاج الكثير خلال الفترة الماضية، وعلق قائلاً:ـ “المرض اللى عندى مناعى، وده معناه إن الجهاز المناعى الخاص بى من المفروض إنوا بيهاجم أى بكتريا ضارة للجسم، ولكن الجهاز المناعى حدث به خلل بقا بيهاجم أى شئ في أجهزة الجسم كله، وفى أوقات كتير برجع دم”.

"كرشى مرض مش عز الشهرة".. تصريحات حمو بيكا تثير الجدل ببرنامج حبر سرى

وأكد حمو بيكا، من خلال اللقاء الذى جمعه بالاعلامية أسما ابراهيم، والتى تقوم بتقديم برنامج “حبر سرى”، والذى يذاع من خلال فضائية “القاهرة والناس”، على أنه يُعانى كثيراً من التعب والمرض حينما يحدث أى خلل في الجهاز المناعى، وتابع قائلاً:ـ “بيحصل الكثير من المشاكل في معدتى، وقتها بقوم وأخد إبره هى اللى بتهدى الدنيا عندى، وفى أول مرة أخدت إبره سعرها كان 120 ألف جنبه، والمفروض كل شهرين باخد إبره تكلفتها 20 ألف جنيه”.

وأضاف مؤدى المهرجانات:ـ “ولما جت جائحة فيروس كورونا المستجد إمتنعت عن أخذ الإبره علشان كنت خايف من المناعة تضعف، وكمان المرض ده جالى بعد لما إشتهرت وبسببه الأطباء منعونى من تناول الكثير من الطعام، وعايش دلوقتى على المكرونه ولسان العصفور وشوربة الخضار، دا حتى شوية المية مش بشربها، وأنا حابب أوجه رسالة للناس اللى بتتريق عليا وعلى كرشى ده مرض أصلاً.. وأنا دلوقتى مش معايا حق الإبره”.

كما تحدث حمو خلال اللقاء، عن الشائعات التى تتردد عن تمثيله في الفيديوهات من أجل ركوب الترند، وعلق قائلاً:ـ “أنا مش بعمل فيديوهات علشان أركب الترند.. بس هما اللى بيغفلونى ويقوموا بتصوير فيديوهات من أجل الترند، وأكيد الناس دى مش بتاجر بيا.. وأنا ببقى سعيد وعادى لما الناس بتضحك لما تشوف الفيديو”.