ياسمين عز: إيه اللي مش طبيعي في إن عروسة تبوس إيد عريسها؟ ده كان المفروض تعمل أكتر من كده بس خافت منكوا

علقت الإعلامية ياسمين عز، في أحدث حلقات برنامجها “كلام الناس” الذي يعرض عبر قناة “MBC مصر” على واقعة تقبيل عروسة ليد عريسها.

ياسمين عز: إيه اللي مش طبيعي في إن عروسة تبوس إيد عريسها؟ ده كان المفروض تعمل أكتر من كده بس خافت منكوا

حيث قالت: “إيه اللي مش طبيعي في إن العروسة تبوس إيد عريسها.. إيه اللي مش طبيعي؟ ده أنا بعتبرها مُقصرة.. انتي قصرتي يا عروسة.. كان عندك فرصة دهبية قدام الناس كلها انك تعملي أكتر من كده بس هي يا عيني خافت منكوا م اللي هتعملوه فيها فلمت الدنيا ببوسة إيد”.

وأضافت: “تعالي هنا بقى.. تعالي هقولك.. عروسة بتبوس إيد عريسها يوم فرحها.. انتي بتتريقي ع البنت ليه؟ مالك ومالها تبوس إيده تبوس مناخيره تبوس كتفه انتي مالك.. راجلها انتي مالك.. عريسها يا أمي انتي مالك.. حلالها بلالها انتي مالك.. فرعونها انتي مالك.. فتطلع واحدة تقولك بتبوسي إيده ليه مالك عاملة كده مش آخر واحد في الدنيا الرجالة الحلوة كتير اوعي حد يحسسك إنه آخر قطعة ما يحسسك انتي مالك.. انتي مالك يا حبيبتي”.

وتابعت: “ده الناس بتدعي في المطرة اللهم صيبًا نافعًا وانتي بتدعي يارب اتجوزه يارب.. يارب انت عارفه يارب.. يارب لو مفيهوش خير خلي فيه خير يارب.. وبعدين مش ده أول ما تتجوزيه بتعمليلنا بقى فرح وتعزمي الناس ورقصة البطريق في الفرح وتلفي انتي وأصحابك وتعملوا القطر وأول ما تتجوزيه تتصوري جنبه وتكتبي على صورته أعظم انتصاراتي عشان تتحسينا إنك خدتيه من غزوة.. ما بقاش عاجبك دلوقتي البنت تبوس إيد عريسها.. بس حلو ليكي أعظم انتصاراتك؟!”.