ياسمين عز لشاكيرا: بيكيه سابك عشان بتزعقي طول الوقت.. ومينفعش أصحابه يقولوله مراتك هي اللي ممشياك

وجهت الإعلامية ياسمين عز، خلال حلقة أمس الجمعة من برنامجها “كلام الناس” الذي يعرض عبر قناة “MBC مصر” انتقادات للمغنية العالمية شاكيرا، بسبب أغنيتها الجديدة التي تهاجم فيها نجم كرة القدم الإسباني جيرارد بيكيه.

ياسمين عز لشاكيرا: بيكيه سابك عشان بتزعقي طول الوقت.. ومينفعش أصحابه يقولوله مراتك هي اللي ممشياك

حيث قالت: “آخر وصلة تلقيح كانت امبارح في كليبها الجديد اللي قالت فيه إيه بقى بتقول لجوزها اللي سابوا بعض يعني انت عامل زي اللي كان معاه عربية فيراري وباعها عشان يشتري عربية تانية أي كلام وانت عامل زي اللي كان لابس ساعة روليكس أصلي غالية وسابها عشان يلبس ماركة تانية رخيصة.. حاجة كده بتفكرني بالله يرحمها الفنانة الكبيرة شويكار لما كانت تغني وتقول ما هو أصل قليل الأصل يسيب الأصل وياخد الصورة”.

وأضافت: “بصوا يا جماعة بصراحة أنا مقدرة وجعها وحرقة قلبها على راجلها شوفوا الست دي مليارديرة ونجمة النجوم وعندها معجبين في العالم من كل حتة شاكيرا مش محتاجة أقول بس الست ست برضه ومهما كانت هي مين أو معاها إيه يعني الراجل راجل تحبه.. التقليح أحيانًا بيكون شكل من أشكال الوجع والألم والندم على الانفصال خلي بالك”.

وتابعت: “بس الحقيقة بعد كل ده أنا ليا أكتر من عتاب على شاكيرا.. حبيبة قلبي خلاص الموضوع خلص والله سواء انتي الغلطانة أو هو الغلطان خلاص سيبتوا بعض وخلصنا.. ولادكم بقى مالهومش ذنب تبقى سيرة أبوهم وأمهم على كل لسان كده كل يوم مينفعش ابنك الصغير يروح مدرسته النهارده الصبح وزمايله يقعدوا يتريقوا عليه ويقولوله يالا مامتك بتقول على باباك كذا كذا في الأغنية”.

واستكملت: “ده انتي أساسًا لما جيتوا تنفصلوا قولتي احنا انفصلنا عشان مصلحة ولادنا فهل بقى من مصلحتهم يبقى العالم كله بيتكلم على أبوهم بالطريقة دي.. ولّا اكمن الراجل ساكت يعني ومش بيغلط وملتزم الصمت ومش بيرد عليكي تفضلي كده أغاني تقعدي تكتبي الأغنية هجاء.. ميفنعش كده تلقحي عليه في الرايحة والجاية بالشكل ده وخلي بالك برضه البني آدم مننا طاقة فالراجل بيفضل يعبي ويشيل في قلبه لحد لما ينفجر وساعتها ما تعرفيش بيكيه هيبقى رد فعله إيه.. النهايات أخلاق يا شاكيرا مش كده الراجل عشرة وعيش وملح 12 سنة من أيام واكا واكا لا عمره وقف في طريق فنك ولا عمره وقف في طريق نجاحك بل بالعكس كان طول الوقت بيدعمك وفي ضهرك فحاولي تفتكريله حاجة من الحاجات الحلوة اللي عملها عشانك”.

وواصلت: “وبعدين معلش ما تلومينيش في الكلام اللي هقوله يعني يا شاكيرا لو عايزة تلومي حد في الموضوع ده أو إنه سابك وراح حب واحدة تانية غيرك فممكن بدل ما تلوميه تلومي نفسك محدش معصوم م الغلط انتي طبعًا لما انفصلتوا بتحاولي تصدري للرأي العام فكرة إنه سابك وخانك مع واحدة تانية ده اللي انتي قولتيه إحنا ما سمعناش منه بس اللي عرفناه من بعض الناس الثقة التانيين ومن ناس قريبين جدًا منكم إن بيكيه مكانش متحمل فكرة إن صوتك عالي بتزعقي طول الوقت بمناسبة ومن غير مناسبة والحقيقة ده واضح من الأغاني بتاعتك بتحبي الصوت العالي طبقتك عالية.. ما هو عنده أسبابه طب عايزاكي تقوليلي مين راجل يقدر يستحمل على نفسه كده ويروح النادي ولا الجيم ولا الشغل بتاعه كل يوم وأصحابه يقولوله أنت مراتك اللي ممشياك ولّا مراتك بتعلي صوتها عليك.. مينفعش ميصحش”.