بسمة وهبة تنفعل بسبب جشع التجار: منهم لله سرقوا فرحة الناس الغلابة اللي بيستنوا اللحمة من العيد للعيد
انفعلت الإعلامية بسمة وهبة، في حلقة أمس الثلاثاء، من برنامجها “90 دقيقة” الذي يعرض عبر قناة “المحور” بسبب جشع تجار اللحوم مع اقتراب عيد الأضحى.
بسمة وهبة تنفعل بسبب جشع التجار: منهم لله سرقوا فرحة الناس الغلابة اللي بيستنوا اللحمة من العيد للعيد
حيث قالت: “عيد الأضحى أو العيد الكبير في ثقافتنا إحنا كمصريين يعني عيد اللحمة.. العيد اللي كل الناس بتتسابق فيه عشان تضحي.. مش بس عشان السبب الديني لأ كمان عشان الناس إنها تدبح وتهادي بعض وتتصدق”.
وأضافت: “وفي ناس حرفيًا الحقيقة مش ببالغ ما بتعرفش طعم اللحمة إلا من العيد للعيد والكل الحقيقة بيتسابق في الخير.. وخير عيد الأضحى هو خير الأضاحي بس للأسف السنة دي ممكن يكون الوضع غير.. وبقى واضح كده قدام ارتفاع أسعار اللحوم إنه فيه ناس كتير متعودة تدبح وتضحي مش هتقدر وطبعًا إحنا ما نقدرش إن إحنا ننكر إنه إحساس صعب على الناس اللي متعودة تدبح في العيد وإحساس صعب على الناس اللي في القرى والشوارع اللي هي بتبقى محتاجة إنها تستنى من العيد للعيد عشان يدخل بيته اتنين أو تلاتة كيلو لحمة من أهل الخير بس يعني ممكن ما يحصلش السنة دي ممكن يبقى مش بنفس الكم ممكن يبقى فيه تقدير معين وقبل أي كلام عايزة أقول منهم لله لمين بقى كل تاجر جشع كل صاحب مزرعة مش بيراعي ضميره”.
وتابعت: “كل تجار أزمات الأعلاف وكل اللي لعبوا في سوق اللحمة واتسببوا في ارتفاع أسعار الأضاحي 3 أضعاف عن السنة اللي فاتت وقبلها.. سرقوا فرحة الناس الغلابة في عيد اللحمة لإن المضاربات اللي عملوها وجشعهم اتسبب في رفع أسعار اللحمة بالشكل ده.. أنا عارفة إن الأسعار غالية والواقع في الأسواق بيقول إن الأضحية النهارده وصل سعره لـ 70 و80 ألف جنيه وأكتر.. حتى اللي كان بيضحي بخروف الأسعار وصلت لـ 13 ألف جنيه.. قولوا الحقيقة للناس مفيش خروف بـ 13 ألف جنيه يا حبيبي بس كده بـ 17 و18.. بس برضه في نفس الوقت الحقيقة عايزة أقول إن ربنا رزق مصر بكتير من أهل الخير.. وعارفة إن كل مقتدر هيكون في العيد بيعمل حاجة مختلفة.. يعني المقتدر اللي كان بيدبح أضحية واحدة قبل كده أنا من غير ما أناشد وأشجع ولا أقول عارفة إن الإحساس بالوضع الحالي دلوقتي إن الناس دي هتتبرع من نفسها وهتدبح أضحية واتنين”.
وأردفت: “جنون الأسعار والافترا ده والحجج بتاعت أصل العلف والدولار.. وكل ده وصلنا لتراجع في البيع والشرا.. مين هيروح يشتري كيلو اللحمة أبو 400 جنيه.. واللي كان بيشتري اتنين كيلو هيروح يشتري ربع كيلو”.
