تحدثت الفنانة هالة صدقي عن نجاح شخصية “صفصف” في مسلسل جعفر العمدة، وتفاعل الجماهير معها، مرددة: “جعفر العمدة مكافأة من الله وطبطبة عليا.. والسبب في النجاح محمد سامي كان طول التصوير يقولي أنتي مش عارفة صفصف دي هتعمل إيه مع الناس.. وفعلا كل كلامه حصل بصورة أكبر مما كنت متخيلة”.
هالة صدقي في معكم
هالة صدقي: “أنا مخضوضة من ردود الفعل على “صفصف”.. وبقول طب أنا هعمل إيه بعد كده”
وأضافت النجمة هالة صدقي في لقائها ببرنامج “معكم” الذي تقدمه الإعلامية منى الشاذلي، قائلة: ” بشكر محمد سامى من كل قلبى إنه شال قشرة كانت موجودة عليا لتظهر هالة صدقى من تاني.. ونجاحى في تأدية دور صفصف هو نجاح لكل “بنات جيلى”.
واستكملت: “السبب الرئيسى في نجاح جعفر العمدة، يرجع إلى مخرج وكاتب العمل محمد سامي”.
وعلقت: “أنا بقرأ الاسكريبت كنت حاسة أن الدور مش هو اللى أنا عاوزاه، اللى مكتوب على الورق حاجة، والتنفيذ حاجة تانية”.
وتساءلت: “مخضوضة من ردود أفعال الناس وعلى السوشيال ميديا لكن أنا فرحانة ومش فرحانة في نفس الوقت أنا ست كئيبة بطبعى فرحانة بالنجاح وزعلانة لأنى فكرت أنا هعمل إيه بعد كدة؟ بعد نجاح جعفر العمدة عيطت وسألت نفسى هعمل إيه بعد كدة؟”.
هالة صدقي: “بعت رسالة لـ محمد صلاح قلتله مش أنت بس اللي بتشوط”
وكشفت هالة صدقي عن كواليس مسلسل جعفر العمدة وأداء شخصية صفصف، قائلة: ” شخصية صفصف تشبهني في أنها شعنونة ومش بتذوق الكلام بتقول الحاجة من غير فلتر اللى في قلبها على لسانها وأنا دمي خفيف أكتر من صفصف”.
واستطردت: “رفعة شبشب هي جت كده وبعت رسالة لمحمد صلاح مش أنت بس اللي بتشوط ودي لياقة بدنية ومكنش مكتوب في الاسكريبت وإيمان اتخضت وراحت لمحمد سامي وقالتله هو أنا هضرب بس، وطبعا لازم المشهد ينزل مش هناخد رأيها”.
وعلقت: “كنت بستمتع بتهزيق نرجس البت بتاعت الأعمال لأنها سرقت الجلاليب بتاعتي، وكان في شوية غيرة بسيطة بينا في اللوكيشن بس مكنش في مشاكل بينا لأننا كنا حابين بعض وكنت بتعامل على إني صاحبتهم”.
