كشف الفنان محمد أسامة والمعروف بـ “أوس أوس”، عن كواليس من حياته الشخصية وعلاقته بزوجته فترة تعارفهما، وأكد على أنها سبب رزقه ونجاحه، وتحدث أيضاً عن العمل بالتمثيل الكوميدى ومدى صعوبته، وأُمنيته في أن يُقدم عمل درامى.
أوس أوس: «ربنا رزقى في شغلى بسبب مراتى»
وأكد الفنان، أثناء استضافته ببرنامج “أسرار النجوم”، وقال:ـ “أنا إتعلمت في مدرسة أشرف عبدالباقى، وده علشان هو ساعدنى كتير ووقف بجوارى، ووثق بقدراتى وساب ليا مساحة للتمثيل، وكان دايماً بيقول نصائحه وتعليقاته في 10 دقائق وبس، وبجد إتعلمت منه كتير وخصوصاً إن التمثيل الكوميدى أصعب أنواع التمثيل”.
وأضاف الفنان:ـ “حقيقى نفسى أوى المخرجين يكتشفونى في أى عمل درامى، وده علشان العمل في كل أنواع الفن متعة بالنسبة ليا مش الكوميدى وبس، وأنا لما بيتعرض عليا أعمال كوميدية مستوحاه من الفيس بوك أو أى موقع تواصل اجتماعى برفض، وده علشان الفنان منا بيتعب أوى في شغله وبيجتهد، ولكن الجمهور دلوقتى بقا قاسى جداً في نقده بسبب السوشيال ميديا، واللى أتاحت الفرصة لأى شخص يقول رأيه بشدة، وده عكس اللى كان بيحصل زمان كان النقد في الجرائد وعلى يد مُتخصصين وبس”.
وتحدث أوس أوس خلال اللقاء، عن إتجاه بعض الفنانين لتقديم مسرحيات خارج مصر، وعلق قائلاً:ـ “الفنان اللى مش بينجح في مصر مش ممكن ينجح في أى مكان تانى، وإحنا زى ما بنهتم بتقديم مسرحيات في السعودية ودول كتيرة برا مصر بردوا بنهتم بتقديم أعمال في بلدنا، وبجد أشرف عبدالباقى بيحاول يسهل علينا العقبات الكتير اللى بتواجهنا في المسرح زى إرتفاع التكلفة وأسعار التذاكر”.
وتحدث الفنان، عن تفاصيل علاقته بزوجته وقال:ـ “مراتى كانت بتشتغل في بنك، ولما شوفتها اتعرفت عليها وبجد هى نعمة كبيرة من الله، وربنا بعتهالى في التوقيت المناسب، وده علشان هى وقفت جانبى وساعدتنى كتير، وربنا فتح عليا ورزقنى لما إتجوزتها، وحقيقى وجودها في حياتى أمر مهم جداً”.
