صرحت الراقصة الجميلة دينا، عن أنها حاولت كثيراً أن تجعل من حولها يعيدوا النظر في فكرة الراقصة، وأنها ليست عديمة أخلاق أو خطافة رجالة كما يعتقد الكثير من الناس.
دينا: «الرقاصة مش خطافة رجالة ولا عديمة أخلاق»
وأكدت دينا، أثناء استضافتها ببرنامج “كلمة أخيرة”، والتى تقوم بتقديمة الاعلامية لميس الحديدى، والذى يُذاع من خلال فضائية “on”، وقالت:ـ “من زمان أوى وأنا قاعدة داخل البالونة الخاصة بيا، وحاطة فيها الناس اللى أنا عاوزة أشوفهم وبس، وأما الناس اللى بتتكلم على الرقص بصورة سلبية بعتبرها خارج البالونة، وحقيقى بمنع عنى الصوت ده”.
وتابعت الفنانة:ـ “وبجد حاولت كتير إنى أغير مفهوم الناس عن الراقصة، وأخلى كل اللى حواليا يحترمونى على قد ما قدرت، وكنت بتصرف معاهم بطريقة تليق بأى بنى آدم محترم، وده كله علشان أحاول أغير فكرتهم عن الراقصة، واللى شايفنها طول الوقت حاجة مش كويسة”.
وأضافت دينا:ـ “وحقيقى حاولت كتير دفعهم لتغيير وجهة نظرهم عن الراقصة ومهنة الرقص، وإن الرقاصة منحلة وملهاش كبير ومعندهاش أخلاق، وعلى طول سبابة وخطافة رجالة، وكمان بتعرف الناس علشان الفلوس وبس، ولكن دى وجهة نظر بنى آدم مش وجهة نظر أو تركيبة راقصة، وأنا طول العمر أمامى، وعمرى ما فكرت إنى أرتبط بحد ما بحبهوش، ومش بختار شخص علشان مواصفاته، وممكن أوى يكون أقل راجل لكن فيه المواصفات اللى أنا عاوزاها”.
وكشفت الفنانة خلال اللقاء، عن أنها تزوجت 9 مرات خلال حياتها وأن هذا الرقم قليل بالنسبة لعدد زيجات الراحلة تحية كاريوكا، وعلقت قائلة:ـ “إتجوزت 9 مرات، والرقم ده قليل بالنسبة للفنانة الراحلة تحية كاريوكا اللى إتجوزت 13 مرة خلال حياتها، وأنا بنافسها في عدد الزيجات”.
