سارة نخلة رداً على تصريحات ياسمين الخطيب عن رفضها تقديم تنازلات: «مش بحب كلمة تنازلات وخلينا نقول واسطة»
قامت الفنانة الجميلة سارة نخلة، بالرد على تصريحات الاعلامية ياسمين الخطيب الأخيرة، والتى أثارت الكثير من الجدل خلال الفترة الماضية، بعد أن قالت بأنها تأخرت في مسيرتها الفنية بسبب رفضها تقديم التنازلات.
سارة نخلة رداً على تصريحات ياسمين الخطيب عن رفضها تقديم تنازلات: «مش بحب كلمة تنازلات وخلينا نقول واسطة»
وأكدت سارة، أثناء تقديمها لـ برنامج “face off”، والذى يُذاع من خلال شاشة “هى”، وقالت:ـ “بجد احترمت كلام كتير قالته الاعلامية ياسمين الخطيب، ولكن في حاجة قالتها أثارت جدلاً كبيراً، وفي ناس وافقتها على كلامها وكمان في ناس كتير عارضتها”.
وتابعت الفنانة:ـ “وعلى فكرة أنا مش بحب خالص كلمة تنازلات.. خلينا نقول واسطة، وده زي ما ناس كتيرة بتشتغل بالفن عن طريق الواسطة، وهى هنا بتتكلم عن حالة فردية تعرضت لها، وده علشان بعض الناس قالت إن دي كلمة مهنية للاعلاميين والفنانين”.
وواصلت سارة نخلة وقالت:ـ “الراجل اللي حاول إنه يعرض عليها حاجة من الحاجات اللي بتقول عليها أكيد شخص مريض وناقص، ولكن إنتي بالأخص يا ياسمين مينفعش تقولي كلام زي كده، وده علشان انتي انسانة مٌثقفة ومحاورة جيدة وبدأت تمثيل، وكمان عندك كاريزما وحضور، وبجد ليكي مني كل الدعم والاحترام والحب بعد الكلام اللي قولتيه عن التحرش”.
وجديراً بالذكر، بأن الاعلامية ياسمين الخطيب تحدثت من خلال تصريحات لها مع الاعلامى نزار الفارس، والذى يقوم بتقديم برنامج “تابو”، والذى يُذاع عبر فضائية “دجلة”، عن طريقتها في التعامل مع التحرش وقالت:ـ “ده على حسب الموقف، وده بمعنى إنه في مكان مغلق غير لما يكون في الشارع وغير لما يكون في التليفون”.
وأضافت الاعلامية:ـ “وأنا في المكتب مرة ضربت المتحرش بالقلم، ومش هينفع أذكر اسماء لكن دايماً بيكون مدير أو مسئول وطبعاً خياله العبيط بيصور له إني ممكن اتغاضى علشان المصلحة، وطبعاً القلم عادةً بيكون في مرحلة التحرش الفعلي، وده عشان رد فعل الطرف الآخر صدمة للمُتحرش”.
وأكدت ياسمين، بأنها لم تُقدم أى تنازلات بهدف المصلحة، حيث قالت:ـ “على فكرة أنا جادة أوي في شغلي، وخسرت حاجات كتيرة لأني لم أُقدم أي تنازلات من أي نوع، وأنا مش بعرف اجامل مخرج أو منتج، وأرى بأني تأخرت في عملي، وكان من الممكن أن أكون في مكان آخر لو وافقت على التنازلات”.
