حل الفنان تامر هجرس، ضيفًا على الإعلامي عمرو الليثي، في أحدث حلقات برنامج “واحد من الناس” الذي يعرض عبر قناة “الحياة”.
تامر هجرس: مكنتش مقتنع بفيلم "الديزل" ومخدتش فيه فلوس وعملته جدعنة لمحمد رمضان
وكشف تامر، خلال اللقاء حقيقة خلافه مع الفنان محمد رمضان، حيث قال: “معنديش خلاف مع رمضان.. بالعكس أنا بحب رمضان جدًا.. ورمضان طلب مني إني أعمل فيلم (الديزل) وعايز أقولك إن أنا عملته جدعنة ليه ولكريم السبكي عشان أنا بحب كريم جدًا والحاج أحمد اللي بحب شغلهم بحس إن هما هيعملوا حاجة كويسة”.
وأضاف: “عايز أقولك إن أنا مكنتش مقتنع بالفيلم ككل ولكن التريند اللي حصل في المشهد اللي بيني وبين محمد رمضان بتاع (انزل على ركبك ياله) دي بلاقي فانز كتير أوي بتبعتلي المشهد وهما بيمثلوه.. حد بيمثل رمضان حد بيمثلني أنا ويقول المشهد فلقيت إن الموضوع عمل بصمة وكان إيجابي جدًا ليا”.
وتابع: “مخدتش فلوس ع الفيلم.. أنا عملته حبًا في الشخصيات اللي أنا قولتها.. أنا عمري ما بندم على أي حاجة وما ندمتش على ده وعملت اللي أنا عايزه.. أنا كنت شايف بس إن هو كان ممكن يستخدمني أحسن من كده في حاجات معينة بس دي بتبقى آراء إخراج.. فلو هو شايف إن هو ما كانش محتاج يعمل كده أوكيه”.
وعن حذف بعض مشاهده من الفيلم، قال تامر هجرس: “ما شالوش أي مشهد من الفيلم.. في حاجات بقى أعتقد بتبقى مجرد شعللة كده تسخنها”.
وردًا على سؤال مقدم البرنامج الذي قال فيه “لو رمضان بكره كلمك قالك عايزك معايا في مسلسل هتوافق؟”، ليجيب: “رمضان شوفته كتير أوي بعد (الديزل) بنتصور مع بعض ونخرج مع بعض ونسهر مع بعض جميل.. وأشتغل معاه تاني طبعًا أه”.
