سمية الخشاب عن أغنيتها الجديدة: صورنا الكليب في الغردقة ودرجة الحرارة كانت 40.. وكنا بنعاني
كشفت الفنانة سمية الخشاب، كواليس أغنيتها الجديدة “أركب ع الموجة” التي طرحتها منذ أيام قليلة.
سمية الخشاب عن أغنيتها الجديدة: صورنا الكليب في الغردقة ودرجة الحرارة كانت 40.. وكنا بنعاني
حيث قالت سمية، في تصريحات تليفزيونية خلال لقائها ببرنامج “ET بالعربي” الذي يعرض عبر قناة “MBC4”: “عملت دعاية كده صورت عندي في البيت بلبس مختلف تمامًا عن الفيديو كليب وحاجة مختلفة تمامًا”.
وأضافت: “في المية هنا بالتليفون ونزلته ع التيك توك فلقيته من أول نص ساعة عمال يعد 100 ألف 200.. 400.. مليون.. اتنين تلاتة.. وفي يومين وصل لخمسة مليون وعلى موقع تواصل واحد ع التيك توك بس.. ع الفيس بوك عامل حوالي 4 مليون.. مجموع المشاهدات في 3 أيام تخطت الـ 13 مليون وده رقم أنا مكنتش أحلم بيه الحقيقة.. فأداني باور غير عادي.. الكليب لسه ما نزلش يا جماعة”.
وتابعت: “أنا سعيدة جدًا جدًا بـ (أركب ع الموجة).. والنجاح غير متوقع في أول ساعات.. وكله ما صدق كلمة مية وحرانة محتاجة تكييف ويا جماعة مش عارفة أعيش.. بقى كله في ظل الظروف اللي إحنا فيه والكهربا والتكييف واللي متعود ع التكييف وع المروحة.. في وقت صح”.
وأردفت: “إحنا صورنا في وقت صعب أوي في يوم كانت درجة الحرارة فيه 40.. وصورنا في الغردقة وكان وقت كل الأوتيلات مليانة تقريبًا يعني كان صعب إن إحنا نصور في مكان براحتنا وما تبقاش الناس باصة في الكاميرا كنا بنعاني من ده أوي بس إحنا الحمد لله المكان اللي صورنا فيه كان معظمه أجانب فكانوا متفاعلين أوي معانا وكنا بنصور وهما ورانا في المية ما كانش حد باصص لنا خالص”.
وأكملت: “الأغنية شبابية خفيفة.. فلما سمعتها عجبتني أوي.. طريقة الأغنية وسرعة الأغنية مناسبة أوي للوقت ده”.
وعن مسلسلها الجديد “أرواح خفية”، قالت الفنانة سمية الخشاب: “مسلسل متميز وغريب وجديد كله أطفال وأنا سعيدة بوجود الأطفال في اللوكيشن.. وفكرة إني أطلع مدرسة كان نفسي أوي أعمل دور مدرسة وأتعامل مع ولاد صغيرين وبيتكلم عن القدرات الغريبة اللي بتكون موجود عند الناس بشكل عام وعند الأطفال.. ممكن تبقى أنت بتحس بحاجة وتحصل تاني يوم فأنت عارفها أو حلمت بيها وصحيت لقيتها اتحققت.. حاجات م النوع ده بقى فيها ساسبنس غير عادي”.
