حل الكابتن عصام الحضري، مدرب حراس مرمى منتخب مصر الأول، ضيفًا على الإعلامية بسمة وهبة، مقدمة برنامج “العرافة” الذي يذاع عبر قناة “المحور” خلال شهر رمضان الجاري.
عندما قال الحضري لشوبير: هلعب غصب عن التخين.. وكل واحد يحط لسانه في بوقه
وعرضت بسمة، خلال الحلقة مقطع فيديو لانفعال عصام الحضري، في مداخلة هاتفية مع الإعلامي الرياضي أحمد شوبير، بعد هروبه من الأهلي وإلى سويسرا دون علم مسؤولي ناديه، في فبراير 2008 لتحقيق حلم الاحتراف بعد تألقه في كأس الأمم الإفريقية التي فاز فيها منتخب مصر على حساب الكاميرون.
وقال السد العالي، في المكالمة: “كل واحد عندك بيبص لمصلحته وانت تعرف كده يا كابتن شوبير” ليرد عليه الأخير متسائلًا: “أنا أعرف كده ازاي؟”، ليستكمل الحضري: “انت تعرف كده إن كل واحد بيبص لمصلحته”، ليرد شوبير: “يا اخي ما تبص لمصلحتك”، ليقاطعه الحضري: “من قيمة شهر طلعوا موضوع الايقاف النادي الأهلي وانت عملت استطلاع إن عصام الحضري يلعب لمنتخب مصر ولّا ما يلعبش لا هيلعب لمنتخب مصر لأن محدش يقدر يقول للكابتن حسن شحاته وهلعب لمنتخب مصر غصب عن التخين”، ليسأله شوبير: “التخين اللي هو مين؟”، ليرد الحضري: “أي حد في مصر”، واختتم الحضري كلامه بقول: “كل واحد يحط لسانه في بوقه وما يتكلمش كتير”.
وعلقت بسمة وهبة، على الفيديو موجهة كلامها للحضري، قائلة: “ندمان انت ع الكلام ده دلوقتي؟”.. ليرد الحضري: “اللي هو إيه؟”، لتجيب مقدمة البرنامج: “كل واحد يحط لسانه في بوقه وما يتكلمش كتير وإن انت هتلعب غصب عن التخين في مصر”..، ليرد السد العالي قائلًا: “لأ أكيد لعبت”، لتسأله: “عملت المداخلة دي ليه”، فيرد: “هما اللي عملوا المداخلة دي معايا عشان في الوقت ده كان عندنا منتخب مصر وكان عندنا ماتشات وفترة كانت فترة مهمة وبعد كده اتكلمت مع الكابتن حسن في الموضوع ده وقولتله حصل كذا فقالي ما تردش إحنا عندنا حاجة مهمة لازم نركز فيها بس”.
وأضاف الحضري: “في وقتها أنا لما أخدت الباور من الكابتن حسن والكلام م الكابتن حسن كان ردي عنيف شوية”، لتقول له مقدمة البرنامج: “بيقولوا إن انت تطاولت على الراجل عدلي القيعي؟”، ليرد عليها قائلًا: “لا لا لا.. المكالمة كلها لمين ما تحدديهاش لشخص واحد ممكن يكون الباش مهندس عدلي موجود ممكن يكون أي حد موجود”.
ووجهت إليه بسمة وهبة، سؤالًا آخر قائلة: “اسألك سؤال نخلص الليلة دي خالص.. مين الأشخاص اللي أنت محقوق لها.. يعني في الأزمة دي مثلًا ممكن تقول لمين حقك عليا؟ غلطت فيهم جيت عليهم؟”، ليجيب الحضري: “هو النادي الأهلي وجماهير النادي الأهلي”، لتكرر مقدمة البرنامج السؤال باختصار: “أشخاص؟ حسن حمدي؟”، ليرد السد العالي: “لأ لأ.. بصي يا دكتورة انتي سألتيني سؤال وأنا قولتلك النادي الأهلي وجماهير النادي الأهلي”.
