كشفت الفنانة اللبنانية دومينيك حوراني، عن تعرض ابنتها للتنمر من قبل أصدقائها في المدرسة بسببها فيديوهات والدتها وهي تتعلم أسس الرقص.
دومينيك حوراني: ليه نقلل من شأن وقيمة كلمة رقاصة؟!.. الرقص ده موضوع صعب جدًا
حيث قالت دومينيك، في تصريحات صحفية: “مفيش فيديوهات جريئة أنا عملت كام فيديو رقص وأنا بتمرن رقص فده مش عيب.. بس بشوف تعليقات كده وبيتنمروا ساعات على بنتي في المدرسة هو أنا لو روحت الجيم عملت كلاسات تمرين رقص يعني بقيت رقاصة؟!”.
وأضافت: “إحنا ليه نقلل أصلًا من شأن وقيمة كلمة رقاصة؟!.. الرقص ده موضوع صعب جدًا وأتحدى أي حد يقدر يعمل الشغل الحلو واللياقة البدنية اللي بتعملها الرقاصات”.
وتابعت: “فكلمة رقاصة يا جماعة مش شتيمة.. أنا ما أعرفش أرقص أنا بتمرن رقص بس ياريت يبقى عندي قدرات الرقص بتاعت الرقاصات كنت هرقص.. ما أعرفش.. أنا دلوقتي أنت شغل الطبلة لأي حد في مصر الحجر هيرقص والطوب هيرقص.. كل الناس بتحب ترقص وده عادي.. بس واحد يرقص بشياكة وواحد يرقص بطريقة مش حلوة ده يفرق”.
وأردفت: “الناس الحمد لله بتحبني وبتشوفني شوية مجنونة وجريئة شوية بس دي مش مشكلتي.. فيه ناس معقدة ورا الشاشة وورا السوشيال ميديا قاعدين بيشتموا طول اليوم بيشتموا كل أنواع الفنانين.. الأول كنت بزعل كنت بتضايق لما أهلي يقروا الكومنتات دي بعدين لقيت إن الموضوع خلاص خدنا على كده الناس كلها بتكتب حاجات دي مشكلتهم مش مشكلتنا”.
واستكملت: “قصاد دول في حوالي 90 % بيكتبوا حاجات حلوة.. فبقيت أقرا الحاجات الحلوة وأشكر الناس.. الحاجات الوحشة لو العمل مش ناجح محدش هيشتمه محدش هيتكلم عليه.. لو العمل ناجح ووصل كل الناس هتدي رأيها ومفيش حد زي التاني يعني ده عادي.. واحد رأيه يبقى مش حابب وواحد حابب.. أنا مش كل الناس هتحبني بس أنا أتوقع إن أنا مثلًا لما أقدم عمل حلو وعمل راقي في السينما ولا المسلسلات ولا الأغاني يوصل للناس يفرحهم يرقصهم يضحكهم معنديش مشكلة حتى لو هما ما بيحبونيش”.
وعن تقديمها للأدوار الجريئة في العديد من الأعمال الفنية، دافعت الفنانة دومينيك حوراني، عن نفسها قائلة: “والله مش دايمًا جريئة أنا دور فلاحة عملته في (البيه رومانسي) دور لابسة جلابية ودور فلاحة.. وفي أغنية (عتريس) برضه عاملة فيها صعيدية مع إن إحنا مصورين الكليب ده في لبنان.. بس كل الناس صدقوني وفاكريني صعيدية باللبس اللي أنا لابساه وفاكرين إن أنا في الصعيد.. وبوعدكوا دلوقتي عندي أغنيتين فلاحي صعيدي يارب تعجبكم.. عاملة دلوقتي ألبوم حوالي 5 أو 6 أغاني.. أتمنى إن الأغاني دي توصل للناس وترقصهم بس”.
