حلت الفنانة دينا الشربيني، ضيفة على برنامج “حبر سري” الذي تقدمه الإعلامية أسما إبراهيم، ويذاع عبر قناة “القاهرة والناس” خلال شهر رمضان.
دينا الشربيني: في بنات بتيجي تتجوز بتبقى مش عارفة حاجة خالص.. لازم الأم تعلمها
ووجهت مقدمة البرنامج سؤالًا لضيفتها قائلة: “من غير كسوف يا دينا قولتي الحرية الجنسية أول علاج للتحرش؟”.. لترد دينا: “أنا ما قولتش حرية جنسية أنا قولت الثقافة الجنسية.. وده قولته على فكرة برضه زمان أوي بس هقولك كان تفكيري إيه”.
وأضافت دينا: “في عندنا كده دايمًا حتة محدش ينفع يتكلم فيها أو محدش يجي ناحيتها وده بيظلم ناس كتيرة أوي البنت لو فاهمة بطريقة علمية إيه الحاجات اللي مينفعش تحصل إيه الحاجات اللي حرام وعيب مش هيبقى فيه ده.. الولد لو محسش بمشكلة إن بنت تبقى قاعدة قدامه أو قاعدة جنبه ومعاملهاش إن هي أخته أو بعيدًا بقى إن في حد ممكن يبقى معجب بحد كل الكلام ده بس انت لازم تبقى حاسس إن الراجل والست ما تحسسهمش إن فيه إيه ده انت قاعد جنب بنت؟ في إيه يا جماعة”.
وتابعت دينا: “ده بيخلي عنده إنه حاسس إن في حاجة غلط فاهمة قصدي.. مفيش حاجة اسمها كده فالفكرة إنه علمه الناس الموضوع ده في ناس مثلًا بنات بتيجي تتجوز وبجد بتبقى مش عارفة حاجة خالص ما بقولش تعرف قبل.. الأم مثلًا تتكسف تتكلم معاها.. لأ علميها عشان هي تبقى فاهمة أنا خايفة بس كلامي يتاخد غلط والله بس اللي أنا أقصده إن من حقها تبقى عارفة حتى لو فيه حاجة.. أنا بشوف إن التحرش مش فكرة إن حد هيمسك حد في تحرش بالعين لأ أي واحدة في الشارع اعتبر إن دي أختك”.
وعن التحرش، قالت دينا: “المفروض المتحرشين يتعاقبوا عشان بجد دي حاجة وحشة أوي ممكن يبقوا مش فاهمينا أو مش حاسين بيها مالهومش مبرر عندي بصراحة والموضوع التاني بقولك برضه مهم طبعًا بس لازم يعني بصي أنا عمومًا بتصعب عليا الناس وبقول في ناس ممكن تبقى بتاخد عقاب كبير وكده بس في الموضوع ده لازم الناس تعرف إن لو عملت كده بجد هتتعاقب يعني دي مش حاجة سهلة وممكن يعمل لواحدة مشكلة نفسية غير عادية”.
