كشفت أرملة الراحل أحمد راتب السيدة فيرا، عن كواليس من حياتها الشخصية، وأنها تعرضت في بداية زواجها لأزمة مالية، وأشارت إلى أنها كانت تقترض المال من والدتها كى تسد احتياجاتها.
زوجة الراحل أحمد راتب عن بداية زواجهما: «كنت بستلف فلوس من ماما عشان ناكل»
وأكدت السيدة فيرا، أثناء استضافتها ببرنامج “كلام الناس”، والتى تقوم بتقديمة الاعلامية ياسمين عز، والذى يُذاع من خلال فضائية “mbc مصر”، وقالت:ـ “فى أول جوازى من الفنان أحمد راتب قعدنا سنة الظروف المادية كانت صعبة، وأنا الحمد لله محسستهوش بكده، وكنت بطلع أتفرج على التليفزيون عند الجيران، وده عشان مكنش عندنا تليفزيون ساعتها، ووصل بينا الحال إنى كنت بروح أستلف من ماما علشان ناكل، وكنت بقولها إدينى جنيه أحاسب التاكسى علشان مش معايا فكة 10 جنيه، ومكنتش حابة أقولها الظروف اللى عندى”.
وأضافت أرملة الفنان:ـ “وكنت بركب الأوتوبيس من الجنيه والباقى كنا بناكل بيه تانى يوم، وساعتها جوز الحمام كان بجنيه، وعمرى ما قلت لماما إننا بنعانى من أزمة مالية نهائى، والمواقف اللى زى دى خلت جوزى يتأكد إنى سند وستر عليه، وده لحد ما ربنا كرمنا، وبعدها قعد يعمل موائد رحمن لمدة 18 سنة”.
وتحدثت فيرا في نهاية اللقاء، عن سر استمرار زواجها من الفنان لمدة 38 عاماً، وعلقت قائلة:ـ “أهم حاجة الصداقة، وإننا نبقى مُتفاهمين ونحكى لبعض كل حاجة، وبجد دى أهم حاجة والقرب في الأفكار، وكمان محاولة إن اهتمامتنا تكون واحدة، وزميلاته بالوسط الفنى إخواتى وقريبين من بعض، وكمان المعجبات بعتبره نوع من شغله، وعمروا ما وصلنى إحساس يخلينى أغير”.
