ردت الإعلامية ياسمين عز، بطريقتها الخاصة على رسالة إحدى الفتيات خلال حلقة أمس الأحد من برنامجها “كلام الناس” الذي يعرض عبر قناة “MBC مصر”.
ياسمين عز: نضفي ورا ودن جوزك يا مدام.. دي المنطقة الوحيدة اللي ما بتطوليهاش
حيث قالت: “واحدة بتقولي ده إحنا هنمرمطلك فرعونك في غسل سجاد العيد وبتضحك.. شوفي انتي النضافة هتاكل من ملامحك حتة من كتر ما بتنضفي ملامحك اختفت.. وجه بلا ملامح من كتر النضافة.. زي ما عندنا كده دروس بقى تفخيم الزوج تعالي بقى نتكلم عن النضافة بما إنك ذكرتي إن انتي هتبهدلي الفرعون في العيد بتحرقي مراحل بتنطي من رمضان للعيد.. إحنا لسه لسه ما دخلش رمضان”.
وأضافت: “زي ما فيه تفخيم الزوج في دروس تنضيف الزوج.. بصي بقى.. نضفي وادعكي ورا ودن جوزك يا مدام.. انتي أه بريمو في النضافة ولا يعلى عليكي كلور رايح وديتول جاي.. بس دي المنطقة الوحيدة اللي ما بتطوليهاش.. مع إنك بتطولي أطول من كده.. بس تيجي عند ودن جوزك وتكسلي.. بتشوفي زوايا وشراشيب وأبعاد السجادة بس ما بتشوفيش ورا ودن جوزك”.
وتابعت: “ودي منطقة مهمة جدًا خلي بالك.. اهتمي بأدق التفاصيل زي ما بتهتمي وقولتلك بأبعاد السجادة.. وقبل ما حد يغلط فيه هو نص غلطة هو نضيف من قاعه لأعلى قمته عطر البندر زهرة اللافندر.. ولكن زي أي حتة ألماس.. حتة ألماس فيه عوامل خارجية من الجو ممكن تلوثها فلما العوامل الخارجية دي تلوث حتة الألماس بتاعتنا فرعونا الصغير الكبير إحنا نهتم بيه وبنضافته لإن هو الواجهة بتاعتنا”.
