حل الكابتن شريف إكرامي، حارس مرمى نادي بيراميدز، ضيفًا على الإعلامية ياسمين عز، مقدمة برنامج “كلام الناس” الذي يذاع عبر قناة “MBC مصر” خلال شهر رمضان الجاري.
رد فعل شريف إكرامي عندما قال له جمهور الأهلي: "الولا ولا أهو خرم أفريقيا أهو"
وتحدث إكرامي، خلال الحلقة عن كواليس رحيله عن الأهلي، وهجوم جماهير القلعة الحمراء عليه، وهتافهم ضده في المدرجات أثناء مباراة الأهلي وبيراميدز.
وسألته مقدمة البرنامج عن آخر مرة دخل فيها النادي الأهلي، ليرد عليها إكرامي قائلًا: “قريب.. من حوالي 6 أو 7 شهور”، لتسأله مرة أخرى: “7 شهور ده بعيد.. تقدر دلوقتي تروح النادي الأهلي وهتروح تعمل إيه؟” ليجيب: “إيه السؤال ده؟! آخر مرة روحت كنت رايح اتفرج على ياسين كان عنده ماتش هناك”.
وتطرقت ياسمين عز، للحديث عن رحيل ياسين، نجل شريف إكرامي عن النادي الأهلي، لينفي إكرامي قائلًا: “لأ محصلش.. أنا اللي مشيت ياسين.. أنا اللي خدت قرار إن ياسين يخرج من الأهلي لأن حسيت إن هو ما كانش بيلعب وحسيت إن أنا ممكن أعمله خطة تانية ممكن تفيده أكتر وفي نفس الوقت أنا معنديش هوس إن ابني يطلع لعيب كورة بالعكس”.
وسألته ياسمين أيضًا، عن الموقف الذي تسبب في غضب ابنه ياسين، في المدرسة بسبب حديث زملاءه عن والده بعد رحيله عن الأهلي، ليرد إكرامي قائلًا: “لأ مفيش هو أنا ياسين من وهو صغير أنا دايمًا كنت حريص إن أنا اتكلم معاه إن مهم أوي إنك ما تديش حجم كبير أوي لكلام الناس وفي الآخر أعمل الحاجة اللي انت مقتنع بيها وبتريحك وساعد على كده لما مشيت من النادي الأهلي في لاعيبة كتير لما بتحس إن في حاجة جماهيرية ضدها أو موجهة أو أي سبب تقفل الأكونت تقفل التعليقات مش عايزين يسمعوا كلام لأ أنا سايب كل حاجة.. مش عشان أنا مش فارق معايا في جزء منه إن أنا مقتنع إن ممكن يكون الجمهور واصله بشكل معين يبقى غضبان الجمهور ده ياما شجع فأنا مستحيل إن أنا اتضايق من حد سيبك من اتضايق بس مستحيل إن أنا فجأة اخد موقف زي ده يعني”.
وأضاف إكرامي: “زي ما الجمهور في ماتش الأهلي وبيراميدز الأخير لما هاجمني أنا في الآخر قولتله انت على راسي لما شوفته وجهًا لوجه وعلى السوشيال ميديا نفس القصة يعني.. لما هتف ضدنا في ماتش الأهلي وبيراميدز في الآخر أنا خدت رد فعل مع الجمهور لما رفعت وشاورت وقولت انتوا على راسي لأنه ياما شجعني فمفيش مشكلة إن لو في وقت أو مرحلة ما جزء من الجمهور واصل له انطباع معين”.
وقالت له مقدمة البرنامج: “قالولك ماسك الهوا بإيديا”، ليرد عليها قائلًا: “لا ده عبد الحليم اللي قال كده.. هما قالولي قالوا في الأول كلام بس كلام عام وبعدين قالوا والله مش فاكر.. قالوا الولا ولا أهو خرم أفريقيا أهو.. وبعد كده بس بيتهيألي”، لتسأله ياسمين: “ما زعلتش؟” ليرد قائلًا: “أكيد زعلت ده جمهور ناديا أنا قعدت سنين طويلة الجمهور بيشجعني بس أنا كنت متوقع إن هيحصل شيء في المدرجات وكنت مش مستوعب على قد ما أنا كنت مديهم عذر بس مش أكتر”.
