حل اللاعب رمضان صبحي، مهاجم نادي بيراميدز الحالي والأهلي السابق، ضيفًا على الإعلامية ياسمين عز، مقدمة برنامج “كلام الناس” الذي يذاع عبر قناة “MBC مصر”.
رد رمضان صبحي على سؤال: هل عرضت على النادي الأهلي ترجع تاني؟ وبجد نفسك ترجع؟
وكشف رمضان، عن شعوره تجاه جماهير النادي الأهلي، الذي أوضح أنه متفهم غضبهم بعد رحيله عن الفريق، ولكنه في الوقت نفسه لا يشعر أنهم كرهوه، حيث قال: “كل اللي بيطلع من الجمهور من ساعة ما مشيت أنا ما بحسش أنه كُره”.
وأشار رمضان، إلى أنه لا يلتفت إلى الهتافات المسيئة التي توجه له من قبل جماهير القلعة الحمراء خلال مبارياتهم أمام بيراميدز، مؤكدًا أنه مؤخرًا أصبح لا ينزعج من ذلك، قائلًا: “بقالي في القصة دي سنتين ونص.. فالموضوع خلاص عدى.. ممكن تبقى جتتي نحست”.
وأضاف رمضان، أن الصورة التي تم نشرها بعد انتقاله لبيراميدز “المطالبة بالصمت”، ليس لها علاقة بجمهور الأهلي، بل أنه فعل تلك الحركة لأول مرة في الصور التذكارية لمنتخب مصر قبل انطلاق مونديال روسيا 2018، قائلًا: “مين أصلًا اللي محتاج يسكّت جمهور الأهلي؟!”.
وتابع رمضان، أنه يحب الأهلي حتى الآن لأنه تربى داخل جدرانه، قائلًا: “أكيد لسه بحب الأهلي.. أكرهه ليه.. إيه اللي حصل عشان أكرهه.. محصلش حاجة”.
وردًا على سؤال هل عرضت على النادي الأهلي ترجع تاني؟ وبجد نفسك ترجع؟ قال رمضان: “أنا أول مرة أسمع الكلام ده.. دلوقتي راجل بلعب في نادي بيراميدز وعقدي فاضل فيه 3 سنين ومبسوط جدًا في النادي مش متضايق خالص.. ومش من حقي إن أنا اتكلم على حد تاني أو على نادي تاني لإني مش ملك للنادي ده.. أنا دلوقتي في نادي بيراميدز نادي محترمه وموجود فيه عايز أعمل حاجة كويسة”.
وأضاف رمضان، قائلًا: “مش حاجة كويسة إن أنا أتكلم عن نادي تاني أو أكدّب أو أقول ده حصل أو محصلش.. أنا عندي شغل وملتزم بعقد مع نادي محترم وإدارة محترمة مع منظومة يعني الناس عايزة كلها تعمل حاجة وأنا واحد من الناس دي اللي عايزة تعمل حاجة فمبركزش في الكلام ده”.
