أثارت الفنانة نهى العمروسى، جدلاً كبيراً بسبب تصريحاتها الأخيرة عن عدم وجود عذاب القبر، الأمر الذى عرضها للانتقاد من قِبل رواد مواقع التواصل الاجتماعى خلال الساعات القليلة الماضية.
نهى العمروسى: «مش همشى ورا كلام الشيوخ»
وأكدت الفنانة، من خلال تصريحات لها مع القاهرة 24 وقالت:ـ “أنا بختم القرآن في شهر رمضان، ومش بتفرج على المسلسلات ومش بمشى ورا كلام المشايخ، ونفسى واحد منهم يقولى إن في آية قرأنية بتتكلم عن عذاب القبر يمكن أكون غلطانة، وبعدها ينتقدوا على راحتهم لكن لما حد يرد ياريت يجيب دليل”.
وقامت الفنانة، بوصف من يقومون بالتحدث عن عذاب القبر بأنهم وهابيين، حيث قالت:ـ “ده ترهيب واسلوب معروف عن الوهابيين، وده اتنشر في وعينا اللى بقا مليان بالأشياء الوهابية، واللى ترجع إلى الإمام أحمد ابن حنبل، وإكمننا شعب وسطى بقينا حنبلى، ونفسى ألاقى شيخ بيتكلم يجيب آية من القرآن الكريم اللى بتتكلم عن عذاب القبر، وساعتها هتأسف له وللوطن العربى كله، وعلى فكرة أنا مش مختصة وياريت المختصين يردوا عليا يمكن أكون غلطانة”.
وتابعت العمروسى رداً على منتقديها:ـ “زعلانين علشان مش هيتعذبوا في القبر.. طب ياريت يتعذبوا عشان أمنيتهم تتحقق، أو يأجروا حد يعذبهم، وأهى شغلانة جديدة ياكلوا منها عيش والسلام”.
وأضافت الفنانة:ـ “بجد أنا مشفتش شعب بيتنمر التنمر ده، والصفات دى ربنا مش بيحبها، وإزاى إنسان مسلم وطيب يفعل مثل هذه الأفعال.. التنمر مرض ربنا يشفى، وعلى فكرة أنا مش بخاف من الموت، وده علشان الموت حاجة حلوة والجسد فيه بيتحرر من الجسم، والناس اللى ماتت رجعت وقالت الكلام ده، وبيقولوا إنهم مش عاوزين يرجعوا للدنيا تانى”.
