صرحت الفنانة الجميلة نسرين طافش، عن رأيها في عمليات التجميل والتى تقوم بها الكثير من الفنانات والمشاهير في الوقت الحالى، إلى جانب حديثها عن سر جمالها ورشاقتها.
نسرين طافش للستات: «اللى مش بتحب الرياضة ترقص شرقى أو ترقص مع نفسها في البيت»
وأكدت الفنانة، من خلال تصريحاتها مع القاهرة 24 وقالت:ـ “كلنا كسيدات بنحب نظهر بأجمل وأحلى شكل في الدنيا، وأنا مش ضد عمليات التجميل.. بس لو الست شايفة إن في حاجة محتاجة تتعدل وهى نفسياً مش مرتاحة لها، ولكن مش بشكل مبالغ فيه، وكمان تتحول لوسواس والأمر يكون تعديل للأفضل وبس، وده علشان الإنسانة دى تكون مستريحة مع نفسها”.
وتابعت الفنانة:ـ “وكل إنسان منا يجب أن يتتبع نظام غذائى جيد، وأما مش مؤمنة بالدايت، ولكن يجب إتباع لايف ستايل أو نظام غذائى، وده مش معناه إنى أخنق نفسى وأحرم نفسى من كل حاجة حلوة، إلا لو وزنى زاد بصورة مش طبيعية، ولكن في الأحوال الطبيعية المفروض إننا نمسك العصاية من النص، وكمان ناخد بالنا من نفسنا كويس، ونجيب خضار وفاكهة كتير في البيت، ومش من الضرورى كل حاجة تكون مطبوخة”.
وأنهت نسرين:ـ “وبجد الرياضة شئ مهم جداً في الحياة، واللى مش بتحب الرياضة ممكن ترقص شرقى أو ترقص مع نفسها في البيت أمام مرآة أو رقص صلصة أو تاخدى درس في الرقص، وده علشان الجسم لازم يتحرك.. ربنا خلق جسم الانسان عشان يتحرك مش يفضل قاعد، وأنا عن نفسى بحب ألعب تنس ويوجا وبروح النادى وبحب المشى أوى”.
وجديراً بالذكر، بأن الفنانة نسرين طافش تحدثت مؤخراً عن مشاركتها في فيلم “أخى فوق الشجرة” بجانب الفنان رامز جلال، وعلقت قائلة:ـ “أخى فوق الشجرة تجربة كوميدية مختلفة كثيراً، وأتمنى إنوا ينال إعجاب الجمهور ويضحكوا من قلبهم، وده علشان أنا بعتبر نشر الضحك والسعادة بين الناس رسالة، وده عشان رفع الروح المعنوية وزيادة ذبذبات الطاقة الإيجابية عندهم، لأن الحياة يوجد بها الكثير من المشاكل والكلاكيع والكل محتاج يخرج من المود اللى هو فيه”.
