قامت الاعلامية منى عراقى، بالظهور من خلال فيديو جديد عبر صفحتها الشخصية على موقع التواصل الاجتماعى “فيس بوك”، لتؤكد في الفيديو حقيقة زواجها من الاعلامى أيمن رشوان، والذى يقوم بتقديم برنامج “الدكتور”.
منى عراقى باكية: مش هتجوز في السر تانى كفاية بقا
وعلقت الاعلامية قائلة:ـ “إيه القرف ده؟.. كل ده يحصلى ليه؟، وخصوصاً أنا مش شايفة أهمية في قصة جوزاى وارتباطى.. دا أنا بقالى يومين مش عارفة أنام ونفسيتى اتدمرت علشان قررت إنى أعلن عن حياتى الشخصية، وخلاص أنا مش عاوزة أتجوز في السر تانى.. ولادى كبروا أخبى ليه تانى؟، وأكدوا عليا مرتبطش في السر، وقالوا خلاص مبقاش في داعى لكده”.
وتابعت منى:ـ “وكمان لما حد كان بيسألنى كنت برد وأقول إنى هتجوز قريب، والسؤال اللى دمر نفسيتى هو مين؟، وأرد في الوقت المناسب وهقول لكم.. إنت مالك؟ أنا حرة أقول وقت ما أنا عاوزة وأقول مين، وده علشان حياته متبظش وحياتى أنا أعلن في الوقت اللى أشوفه مناسب”.
وأضافت:ـ “وأنا في فرح سالى روحت سلمت على أيمن رشوان وميلاد أبى رعد، وده علشان هما دول أقرب ناس ليا في الفرح.. على طول الناس قالت بس يبقى هو أيمن، وبعدها على طول لقيت الخبر في الجرنال واتفاجئت زيه بالخبر، وكمان مكنتش مُتخيلة الموضوع ياخد الأهمية دى.. براحتكم.. اهروا شوية”.
وأوضحت:ـ “وكمان اللى عرفنى الخبر ميلاد أبى رعد.. قابلنى وقالى إلحقى علشان الناس شافتكم وانتوا بترقصوا في الفرح وأيمن قال إنكم إتجوزتم، وأنا على طول طلعت في فيديو وقلت مش أيمن هو أخويا وصاحبى، وهو طلع ونفى الخبر، ومن ساعتها المحمول الخاص بى مبطلش رن، والكل بيسأل إتجوزتى مين؟.. إنت مالك”.
وعلقت:ـ “هو يعنى إيه جواز منى اللى بقالها سنة بعيدة عن الشاشة.. تبقى دلوقتى التريند الأول عربياً، وكمان تطلع قناة المفروض إنها مُحترمة تقول مش دى الكدبة الأُولى.. هو إيه الهم ده؟، وأنا ياما عملت شغل ولا حد سأل فيا وعملت نجاحات كتير ولا حد عبرنى.. ليه خبر الجواز قلب الدنيا بالشكل ده؟”.
وفى نهاية الفيديو لم تتمالك منى نفسها وقامت بالبكاء وقالت:ـ “أنا مش عاوزة أقول هو مين، وكل اللى عاوزة أقوله دلوقتى مش أيمن، وأنا وقتها قلت ده..إيه الحكاية؟.. مين يجى يخلصنى من التريند ده؟.. ولادى إتأذوا وحياتى اتلخبطت وربنا عالم بحالى دلوقتى، وفى النهاية القصة تافه أوى”.
