صرحت الفنانة الجميلة ليلى طاهر، بأنها قررت اعتزال الفن وأن القرار لا رجعة فيه، وعللت السبب في أنها تريد أن يحتفظ الجمهور بصورتها قبل أن تُعلن اعتزالها، وخصوصاً بأن الاعمال التى تُعرض عليها في الوقت الحالى سوف تُقلل من مشوارها الفنى، على حسب تصريحاتها.
ليلى طاهر عن قرار اعتزالها الفن: «قفلت صفحة مشوارى الفنى»
وأكدت الفنانة، من خلال مداخلة هاتفية مع الاعلامية المعروفة سهير جودة، والتى تقوم بتقديم برنامج الستات، والذى يُعرض من خلال فضائية “النهار”، وقالت:ـ “مش هرجع للفن تانى وده قرار مش راجعه فيه أبداً، وأنا بقول إنى عملت كل حاجة حلوة، واشتغلت في مختلف مجالات الفن (المسرح والسينما والتليفزيون)، وحقيقى قفلت صفحة مشوارى الفنى، وده علشان بعد الثورة توقف الفن، وأنا لما بعدت عن الشغل فترة ورجعت تانى عملت حاجات معينة وبعدها وقفت وقولت كده كفاية خلاص”.
وأضافت ليلى:ـ “أنا عملت كل حاجة حلوة في مختلف المجالات، وكمان ربنا وفقنى على الآخر وكسبت ثقة الناس وحبهم، وأنا مش عاوزة أعمل تانى حاجة تقلل من اللى عملته، وده علشان اللى جاى أقل من اللى فات لأن السن له حكمه وبيحدد الأدوار، وبقول إنى سيبت تاريخ مشرف ومش عاوزة أضيعه”.
وجديراً بالذكر، بأن الفنانة ليلى طاهر أعربت عن بالغ حزنها بسبب الشائعات التى لاحقتها خلال الفترة الماضية، وتحديداً بعد أن تعرضت لوعكة صحية، وأشارت في تصريحات لها مع القاهرة 24 وقالت:ـ “بيقلقوا الناس عليا، واللى يقول رجلها اتقطعت واللى يقول ماتت، وأنا الحمد لله كويسة وبخير، ولكن أنا مش لوحدة كل الفنانين بيتقال عليهم كلام وشائعات، وبيشتغلوا علينا وبيكتبوا عنا بلاوى، وللأسف الشديد الناس بتهتم بالكلام ده وبتقرأه، ولكن إحنا في الحقيقة مفيش حاجة حصلت”.
