كشفت الفنانة القديرة سميرة عبد العزيز، تفاصيل خلافها مع الفنان محمد رمضان، الذي نشب بعد رفضها التمثيل معه في أحد أعماله الدرامية.
سميرة عبد العزيز: محمد رمضان يجيد فنه إجادة تامة.. وفنان عظيم ربنا يباركله
حيث قالت في تصريحات تليفزيونية خلال لقائها ببرنامج “بنت البلد” الذي تقدمه الفنانة نشوى مصطفى، ويعرض عبر قناة “تين”: “مؤلف عرض عليا مسلسل مع محمد رمضان قولت له أنا لازم أقرا الأول.. قريت لقيت أم بلطجي.. فأعتذرتله قولتله أنا متأسفة.. أنا بيطلقوا عليا دلوقتي أم العظماء لإني عملت أم الإمام متولي الشعراوي.. أم الإمام الترمذي.. أم أم كلثوم.. وأم عبد الوهاب في المسرح.. مقدرش أعمل أم بلطجي وأنا متأسفة مش هقبل”.
وأضافت: “أنا أقصد أم بلطجي للشخصية اللي مكتوبة على الورق ما أقصدش الشخص.. أنا أعتذرت عن نص.. بصيت لقيت جايلي رسالة على موبايلي أنا أمي جزمتها برقبتك انتي إيه فاكرة نفسك إيه وتحته محمد رمضان.. هو أعتذر بعدها وقال ده واحد من المعجبين بتوعي هو اللي بعت الرسالة.. هو قال مش أنا اللي باعتها ده واحد من المعجبين.. فأنا قبلت ده وقولتله أنا آسفة محصلش حاجة”.
وتابعت: “هو فنان ناجح ومحقق نجاحات كبيرة جدًا وروحت اتفرجت على مسرحية ليه من غير ما يعرف والله.. أشتريت تذكرة وقعدت اتفرجت ع المسرحية وهو فنان يجيد فنه إجادة تامة.. فنان عظيم ربنا يبارك له يارب”.
وأردفت: “هو لما أعتذر وقال اللي بعت ده مش أنا ده حد من المعجبين أنا قبلت ده خلاص انتهينا.. لكن هو كفنان حبيت أشوف هو بيعمل إيه حضرت المسرحية وفعلًا لقيته فنان محترم وبيعمل شغل مسرحي جميل جدًا وقولت للناس اللي كانوا عازمني أشوف بلغوه تحياتي.. وهو ما يعرفش أنا ما قولتش لحد خالص”.
