كشفت الفنانة ميرهان حسين، خلال لقائها مع الإعلامية ياسمين عز، في حلقة أمس الجمعة من برنامج “كلام الناس” الذي يعرض عبر قناة “MBC مصر” عن أسباب رفضها لمسلسل “ضرب نار” لياسمين عبد العزيز، وأحمد العوضي، وأغنية “توتا فروتا” لأيتن عامر.
ميرهان حسين: دي أسباب رفضي لمسلسل "ضرب نار" وأغنية "توتا فروتا"
حيث قالت: “أنا كان آخر حاجة بتتعرضلي مسلسل (الونش).. مع الفنان محمد رجب.. أنا كنت عاملة فيه دور بطولة.. وكنت عاملة شخصية بالنسبة لي من أحلى الشخصيات اللي أنا عملتها (نوارة).. أنا اشتغلت ع الدور أوي كفنانة يعني.. طبعًا كان مكتوب حلو أستاذ أحمد عبد الفتاح.. بس أنا الشخصية حبيتها أوي وأشتغلتها من قلبي.. وكنت حاسة إنها عملت لي إشباع معين كده فالدور اللي اتعرض عليا بعد كده كنت حاسة إن مش هي دي الخطوة اللي كنت المفروض أخدها بعد دي يعني ما حسيتش إن دي الخطوة الصح”.
وأضافت: “مش ده الدور اللي أنا كنت حابة أقدمه بعد (نوارة).. أنا بعمل اللي أنا شايفاه صح وباخد وقتي في إني أفكر ولما باجي أعتذر بقول الأسباب الحقيقية يعني عمري ما بقول سبب غير الحقيقي.. يعني أيًا كان.. لو حاجة ليها مشكلة بالمواعيد بقول أصل المواعيد.. لو هما يقدروا يستنوا شوية أو ننسق المواعيد بيحصل.. الدور شايفة إن هو مش ده اللي أنا حابة أقدمه.. أو مثلًا نوعية أدوار معينة.. أنا في الأول اتحصرت كتير وفترة طويلة في نفس الدور كان بيتعرض عليا نفس الدور.. اللي هو دايمًا دور معتمد على مواصفات شكلية وأنا ما كنتش عايزة ده أنا كنت عايزة أمثل.. كنت عايزة أقول أنا بعرف أمثل ومش شرط خالص أطلع بمثل شعري معمول ولا حاطة ميك أب.. أنا اللي كنت بطلب ده بس كان نفسي في دور أقدر أعمل فيه كده.. برفض للأسباب اللي أنا مقتنعة بيها وبوضح أسبابي وأنا بشوف إن دي حاجة محترمة جدًا لإني دايركت لا بلف ولا بدور”.
وعن سبب رفضها أغنية “توتا فروتا” التي غنتها الفنانة أيتن عامر، وحققت نجاحًا كبيرًا، قالت الفنانة ميرهان حسين: “الأغنية لذيذة وأيتن عملتها حلو أوي بس أنا برضه كنت عايزة أعمل حاجة تانية.. أنا كنت عايزة نوع تاني من الكلام شكل تاني من الميوزك حاجة تانية”.
