حلت الفنانة ميسرة، ضيفة على الإعلامية راغدة شلهوب، في أحدث حلقات برنامج “نص الكلام” الذي يعرض عبر قناة “النهار”.
ميسرة: تربيتي كانت دينية والحمد لله بصلي وعلاقتي بربنا كويسة
وكشفت ميسرة، خلال الحلقة العديد من الأسرار حول حياتها الشخصية، حيث واجهتها مقدمة البرنامج بتصريح سابق قالت فيه: “والدي لو شاف أدواري الإغرائية هيدبحني”، لترد ضيفتها قائلة: “بابا طبعًا ما كانش هيوافق ده أكيد يعني.. بس عايزة أقول اعتراض إيه بقى أدوار الإغراء؟”.
وأضافت: “الضحكة.. دور رقاصة بس معملتش حاجة مبتذلة يعني ما طلعتش بأدوار ساخنة يعني فاهمة إزاي.. يعني أدوار ساخنة أحضان وقبلات والكلام ده.. ومشهد عادل إمام في السرير كنت أنا لوحدي وهو لوحده.. والمشهد ده مفيهوش لا أحضان ولا قبلات.. إحنا رقصنا بس”.
وتابعت: “تربيتي كانت دينية والحمد لله أنا بصلي وعلاقتي بربنا كويسة الحمد لله لكن الأدوار دي بصي أصل السفارة في العمارة دور كان بيدي تلميس إن جميع فئات الشعب مهما كانت بتشتغل حتى لو هي عايشة ع الرزق الحرام هي بترفض هذا.. بترفض هذا الكيان المغتصب فدور مغري وعادل إمام برضه فدور حلو والناس برضه لازم تبص للمراد بتاع الفيلم ما تبصش برضه انتي كنتي طالعة إزاي”.
وعن أول مرة شاهدت والدتها مشهدها بالفيلم، قالت ميسرة: “كانت لوحدها.. ولما رجعت البيت خدت كلمتين في عضمي بس أنا شرحتلها الوضع بعد ما شافت المشهد وهزقتني وكده قولتلها ده لوحده وأنا لوحدي ومفيش حاجة زي كده.. وبعدين ده إحنا حوالينا مليون عامل ده شغل”.
