أثارت الفنانة ميسرة، جدلًا واسعًا بسبب التصريحات التي أدلت بها خلال حلولها ضيفة على الإعلامية راغدة شلهوب، في برنامجها “نص الكلام” الذي يعرض عبر قناة “النهار”.
ميسرة: أوافق أتجوز راجل مراته مقصرة معاه وبيدور على واحدة تملى الفراغ ده
وواجهت مقدمة البرنامج ضيفتها بتصريح سابق لها قالت فيه: “ممكن أتجوز راجل متجوز لو في حاجة ناقصاه من مراته”، لترد ميسرة: “لأ أنا ما قولتش كده أنا ما بغيرش كلامي أنا قالولي ما اتجوزتيش لغاية دلوقتي ليه قولتلهم عشان أنا معظم الرجالة عندها فصام شخصية”.
وأضافت: “أنا أحب الطبيعية في التصرفات أنت بتضحك يهزر معايا ومراته موجودة مش ياخد دور إن هو لا ما بيهزرش وخايف من مراته والست برضه اللي تنكد على جوزها عشان بيهزر بره برضه عندها نقص في الشخصية أنا أحب الطبيعية فأنا ما أحبش الراجل يبقى قدام مراته حاجة وبره حاجة تانية”.
وتابعت: “قدام مراته يبقى متحفظ من غير مراته يتكلم بود ويهزر.. لأ قدام مراتك بتفضل متحفظ خليك متحفظ قدام مراتك ومن ورا مراتك.. عايز تبقى على طبيعتك خليك قدام مراتك أو ورا مراتك ده اللي أنا قولته.. ما اتجوزتش عشان كده لكن السؤال التاني بقى هل ممكن تتجوزي واحد متجوز قولتلهم لو حبيته واقتنعت بيه ومراته فعلًا مقصرة معاه واتأكدت إنها مقصرة معاه لازم اسألها هو انتي فكرك ممكن اتجوز واحد وأنا عارفة إنه متجوز من غير ما أسأل مراته.. ولو ما قبلتش يبقى عنده الجرأة أصل أنا برضه مش هتجوز من وراها”.
واستكملت: “يعني هقولك على حاجة تكون مراته عندها مشاغل في حياتها ومش قادرة تملى حياته بما يكفيه أو تكون مراته تفكيرها وحياتها وصلت الست بتوصل لسن بيبقى عندها تشبع من الراجل وبتكتفي بولادها فاهمة إزاي فهو بيدور على واحدة تانية تملى الفراغ ده هو أنا لو لقيته هو كده واقتنعت بيه ثقافيا وماديًا ونفسيًا وفكريًا أه هتجوزه”.
