لطيفة عن “سكوت هنصور”: رفضت أعمل مشهد جريء.. ويوسف شاهين وخالد يوسف حاولوا يقنعوني وأحمد وفيق هو اللي وقف جنبي

حلت المطربة التونسية لطيفة، ضيفة على الإعلامية منى الشاذلي، في أحدث حلقات برنامج “معكم” الذي يعرض عبر قناة “cbc”.

لطيفة عن "سكوت هنصور": رفضت أعمل مشهد جريء.. ويوسف شاهين وخالد يوسف حاولوا يقنعوني وأحمد وفيق هو اللي وقف جنبي

وتحدثت لطيفة، خلال اللقاء حول فيلم “سكوت هنصور” الذي شهد ظهورها على الشاشة كممثلة لأول مرة، حيث قالت: “كانت من أحلى التجارب.. في عباقرة أنا أتعاملت معاهم كانوا شبه بعض.. الناس الكبار مع حفظ الألقاب زي يوسف شاهين وزياد رحباني والعظيمة فاتن حمامة.. اللي تقابليهم وتشوفيهم فمبالك لما تتعاملي معاهم من أبسط الناس جدًا.. زي العظيمة فيروز مثلًا أنا كان ليا حظ إن أنا زورتها في بيتها.. أنا أتعلمت م الناس دي”.

وأضافت: “كان اللي هيقولي عليه يوسف شاهين هعمله.. قالي في مشاهد ما تحطيش مكياج ويخش للماكيرة الفرنساوية يقولها ما تخليهاش تطلع حلوة.. ده يوسف شاهين”.

وتابعت: “اتطلب مني حاجة وأنا رفضت لإني كنت متفقة م الأول إني مش هعملها.. مشهد اتطلب مني وأنا رفضت أعمله.. مشهد جريء ما كانش مكتوب في السيناريو.. اتقال قدام الكاميرا على طول وإحنا بنصور فأنا قولت ستوب مش هعمله وأنا كنت متفقة مع أستاذ يوسف ومع أستاذ خالد يوسف برضه.. وخرجت من لوكيشن التصوير وقعدت جوه وجاني أستاذ خالد قعد يتكلم معايا أستاذ خالد يوسف قولتله لأ مش هعمله.. أديكوا الأغاني خدوها هدية وخلاص”.

وأكملت: “بعدها الأستاذ يوسف زعل وقال فركش.. فركش التصوير بعدين جاني مكان اللوكيشن اللي أنا فيه.. قالي انتي عارفة أنا عملت كده ليه وأصريت إنك تعملي كده ليه عشان أنا شايف فيكي فنانة ما شوفتهاش من سنوات.. والحقيقة اللي وقف معايا كمان أحمد وفيق.. حبيب قلبي الفنان الجميل أحمد وفيق.. قالهم يا جماعة هي قالت لكم م الأول إن هي مش عايزة تعمل كده انتوا ليه تغصبوا عليها قدام الكاميرا”.