حلت الفنانة انتصار، ضيفة على الإعلامية بسمة وهبة، مقدمة برنامج “العرافة”، الذي يذاع عبر قناة “المحور” خلال شهر رمضان الجاري.
انتصار عن محمد رمضان: بيمثل لي ذكرى مهمة مش ممكن أي حاجة تلوثها
وعرضت مقدمة البرنامج مقطع فيديو لضيفتها وهي تهاجم الفنان محمد رمضان، وتقول عنه “ياريت يبطل يتكلم عن حياته الشخصية يعني يقفل بوقه شوية وهو مش نمبر وان هو عمل اغاني انه نمبر وان وعلى فكرة الاغاني بتاعته حلوة يعني وبيحاول يعمل فيها كراكتر الأمريكان الزنوج يعني عامل شغل وفي وقت الفراغ بتاعه بيسلي نفسه”، وعرضت أيضًا مانشيت لإحدى الصحف بعنوان: “محمد رمضان يحرج انتصار بعد هجومها عليه”.
وسألتها بسمة، عن تعليقها على الفيديو الذي عرضته لها، ورد محمد رمضان عليها، حيث قالت انتصار: “من باب المحبة والمناغشة وما زعلش مني ودليلي على إنه ما زعلش قوة علاقتي بيه.. قوة علاقتي بيه أكبر من إنه يزعل.. أنا بمثل له حاجة مهمة وهو بيمثلي ذكرى مهمة هو بيفكرني بيها فمش ممكن اللحظة دي أي حاجة تلوثها”.
وعن الذكرى، قالت انتصار: “كان هو لسه مش معروف وصغير شوية عن كده وأنا طبعًا كنت أصغر كنا في مسرح البالون وكان بيمشي معاه واحد صاحبه شبهه أوي وكانوا ماشيين بشنطة هاند باج على كتفهم كإنهم خارجين من مدرسة شباب بقى ولابس قميص وبنطلون وصاحبه لابس قميص وبنطلون زيه برضه شبه بعض أوي حتى صاحبي ده هو قالي بعد كده اسمه إيه ودخلوا مسرح البالون وكان إبراهيم نصر الله يرحمه ومحسن حلمي المخرج الله يرحمه ومعانا حد تاني جوه الخشبة”.
وأضافت: “فأنا لقيت اتنين صغيرين كده جايين قولتله انت عايز إيه يا حبيبي والتانيين بقى بيتكلموا في الشغل أنا الوحيدة اللي انتبتهله وهو صغنون كده قالي احنا بنلف في المسارح وبندور على شغل وفرص على فكرة هو اللي فكرني أنا لما فكرني اتخضيت أنا عملت كده فعلًا أنا قد إيه أنا كويسة بجد فقولتله طب انت عايز تعمل إيه إحنا بنعمل بروفات وبعدين ممكن يزعقوا قام قالي إحنا بنلف ع المسارح وكده بس عايزين نوري الأستاذ محسن حلمي إن إحنا بنعرف نمثل قولتله طيب طبعًا أنا خايفة برضه المخرج ممكن يقولي لأ مش عايز حد يعطلني.. روحت قولتله معلش في اتنين شباب صغيرين عايزين يعملوا مشهد هو لقاني متحمسة فقالي طيب ماشي هاتيهم فبصيت في عين إبراهيم نصر عشان إبراهيم قوي جدًا فممكن يقولي إيه في إيه وبعدين جسمه مصارع كده وبيخوف أساسًا يعني منظره وهو قاعد يخوفك قولتله الولاد هيجوا يعملوا قالي أه يا ماما يالا يالا ما جاتش ع الخمس دقايق دول”.
وتابعت: “فقولتلهم تعالوا ادخلوا فوقف قدام المسرح قدام المخرج قعد ورا وهو وقف كإنه واقف قدام الجمهور يعني وقلعوا الشنط وقالي أنا هقلد أحمد زكي وزميله قلد محمد سعد جابهم بالظبط.. عمله حلو أوي ونزل ع الأرض ووشه وكله وأنا سقفت جامد وأستاذ محسن سقف وإبراهيم نصر قال برافوا يا ولاد تمام ربنا يوفقكم إن شاء الله مجاملة يعني بس هو عنده هم أكبر المسرحية.. قولتلهم هايلين بس لازم تمشوا دلوقتي عشان أنا مش قادرة استحمل مغامرة أكتر من كده خايفة أنا اتشاط بعدها.. أنا صعب عليا إن هما جايين م الضلمة وبالليل وبعدين في ديناصورات ع المسرح.. وعايزة أكلملك الحكاية دي.. كنا في مهرجان القاهرة السينمائي الدولي وفي فيلم ليه كان معاه سوسن بدر في الفيلم وفي الحفلة بتاعت المهرجان نفسها بعد الافتتاح بنروح مكان نتجمع فيه كلنا ومعانا الأجانب ولجنة التحكيم فلقيته بيقولي ازيك يا انتصار كان بدأ لسه بقى بس كان طالع يعني قولتله ازيك يا محمد عامل إيه.. قالي انتصار انتي مش فاكرة.. هو كان طول شوية عن الفترة اللي فاتت بس ما اتغيرش قولتله فاكرة إيه؟ قالي خلاص بقى.. قولتله لأ فاكرة إيه؟ قام قالي فاكرة الولد الصغير اللي كان معاه صاحبه ودخل مسرح البالون وكان إبراهيم نصر ع المسرح وكان عايز يقلد فنانين وانتي قولتيله يالا خش قولتله انت؟! قالي أنا.. قد إيه أنا ما اهتمتش بيه أنا اهتميت ازاي أنا عملت كده والنتيجة كانت سليمة بالدليل إنه بيمثل أهو”.
