كشفت الفنانة الكبيرة إلهام شاهين، عن رأيها في مهرجان “العالم علمين” الذي يقام في مدينة العلمين الجديدة.
إلهام شاهين: سعداء بالتطور اللي بنلمسه كل يوم في بلدنا
حيث قالت في مداخلة هاتفية لها مع الإعلامية لبنى عسل، مقدمة برنامج “الحياة اليوم” الذي يعرض عبر قناة “الحياة”: “أكيد كلنا سعداء جدًا بالتطور اللي إحنا بنلمسه كل يوم في بلدنا ومدينة العلمين بقت مدينة رائعة يعني بلد بأكملها ومن أجمل مناطق الساحل الشمالي وإحنا الحقيقة يمكن في بلاد كتيرة فيها بحر بس مفيش بلاد فيها الجو بتاعنا.. يعني نتميز إن عندنا أحلى منطقة في البحر المتوسط إحنا كمان جونا رائع”.
وأضافت: “وفيه شعب مضياف جميل ويعني بقولك كل أصحابي دلوقتي كل اللي كانوا بيسافروا بره في أي شواطئ في أي مكان في العالم بقى كل اتجاهم دلوقتي للساحل الشمالي.. فالحمد لله عندنا أماكن جميلة نفتخر بيها زي ما عندنا السياحة مثلًا في الأقصر في أسوان كآثار.. زي ما عندنا مثلًا في الشتا الناس كلها بتحب تروح الغردقة شرم الشيخ الجونة مرسى علم.. ودلوقتي الساحل الشمالي هو ده أجمل منطقة فعلًا”.
وتابعت: “أنا سعيدة جدًا بالتطور اللي أنا بشوفه في البلد دي فرحانة أوي فرحانة بإقبال الناس كلها على مصر.. طبعًا بقى وجود المهرجانات كلها الرياضية والفنية سواء مهرجانات غناء أو مهرجانات سينما أو مهرجانات دراما.. كلها طبعًا بتخدم المنطقة وهتخلي ناس كتير تبقى حابة تيجي يعني دعاية سياحية.. الناس كلها أكتر بلد يعرفوها في فرنسا كان عشان مهرجان كان عمل دعاية جامدة جدًا.. ومن أكتر البلاد برضو المعروفة في إيطاليا تلاقي فينيسيا بسبب مهرجان فينيسيا مهرجان السينما.. فإحنا كمان هنا هيبقى عندنا مهرجان مهم في العلمين أعتقد إن هو هيعمل دعاية سياحية رائعة”.
