تحدث الإعلامي عمرو أديب، خلال حلقة أمس الجمعة من برنامجه “الحكاية” الذي يعرض عبر قناة “MBC مصر” عن أزمة الكهرباء وتخفيف الأحمال بسبب ارتفاع درجات الحرارة وخفض ضغط الغاز، التي يعاني منها المواطنين خلال الفترة الحالية.
عمرو أديب للحكومة: لو سمحتم قولوا للناس لو النور مش هيرجع الأسبوع الجاي
حيث قال: “بلا تخصص محدش عايز يردلنا ع السؤال ده.. ما هو المصريين بيشدوا في شعرهم جامد.. عندهم حاجتين هما واثقين فيهم جدًا.. محطات الكهربا والغاز يعني دول حاجتين المصريين بيقولك معلش الدنيا صعبة وبتاع بس عندنا محطات الكهربا وعندنا الغاز.. إحنا دولة منتجة ومصدرة للغاز إيه المشكلة طبعًا إحنا ما قدرناش نعرف رد من وزارة البترول إنما الناس بتقول إيه لما تكلم ناس فاهمين في الموضوع الناس بتقولك إيه.. تقولك والله إن وزارة البترول محتاجة الغاز للتصدير.. أنا مش بقول إن هو ده حقيقة السبب لإن وجوده في السوق المحلي بسعر وتصديره بسعر آخر.. إنما نلقى تصريح لوزير البترول بيقول إيه بيقول يا جماعة أنا بقالي 3 أشهر ما صدرتش غاز.. طب الغاز فين؟ فيه ألغاز في موضوع الغاز”.
وأضاف: “كل ده مالناش دعوة بيه إنما أنا كمواطن ماليش دعوة بيه أنا ليا إن النور بقى بيتقطع وبقى يتقطع لأوقات طويلة.. يا جماعة لو سمحتم قولوا للناس لو النور مش هيرجع الأسبوع الجاي يعني أنا مش قادر أفهم يعني هو الأسبوع الجاي إيه اللي هيتغير؟! درجات الحرارة الأسبوع القادم تكاد تكون زي الأسبوع اللي فات وتكاد تكون أسوء.. طب إيه اللي هيحصل جديد؟! ليه مفيش غاز؟! عظيمة محطات الكهربا.. إنما محطات الكهربا بلا غاز! ألغاز!.. الناس عايزة تفهم.. واللي أنا فهمته إن طبقًا لوزارة الكهربا إن الأسبوع الجاي مش هيكون فيه قطع نور تاني”.
