تحدث الإعلامي عمرو أديب، في حلقة أمس الأحد من برنامجه “الحكاية” الذي يعرض عبر قناة “MBC مصر” عن فوز الأهلي على الوداد المغربي في نهائي نسخة 2022/ 2023 من بطولة دوري أبطال إفريقيا.
عمرو أديب: كنت بتفرج ع الماتش وحاطط إيدي على قلبي.. بس الأهلي ما بيتغلبش
حيث قال: “مصر سعيدة.. مصر مبسوطة.. مصر جميلة.. مصر جميلة.. خليك فاكر.. يفوز الأهلي بهذه الكأس وبجد والله أنا كنت واقف في الفاصل بتفرج على الثواني الأخيرة وحاطط إيدي على قلبي وكان قلبي يقطر دمًا يعني كان قلبي يخفق ويخاف ويرتعب كل هجمة تيجي على الأهلي إنما الحمد لله الأهلي ما بيتغلبش.. الأهلي ما بيسيبش.. الأهلي كسب”.
وأضاف: “يفوز الأهلي ببطولة إفريقيا وألف مبروك وهو انتصار يمكن في ناس تقولك إيه انت مالك انت زملكاوي لأ يمثل مصر ويمثل الكرة المصرية وفي حقيقة الأمر كل اللاعيبة اللي موجودة في الملعب دول بنحبهم وبنحب أدائهم وبنحب احترافهم وبنحب قدرتهم في لعب الكرة.. الناس دي لعبت ماتش صعب عصبيًا صعب.. نفسيًا صعب.. وهما حطوا عليهم ضغط نفسي.. قالولهم انتوا المرتين اللي قبل كده جيتولنا واتغلبتوا هتبقى التالتة يا جماعة.. وكان الأهلي أعصابه ثابتة.. الراجل السويسري ده برضه السويسريين برضه يجيدوا ظبط الأعصاب الراجل ده عمل فرقة كويسة غير من لاعيبة كتير ما كانتش بتنزل بقى لاعيبة عندها فعالية.. بيلعب بلاعيبة كتير.. ملعب أكتر من 32 لاعب في الموسم فالناس ما عندهاش الإرهاق اللي كان دايمًا الأهلي بيعاني منه”.
