عمرو أديب: اللي اتعمل في محمد فؤاد من امبارح للنهارده غير طبيعي

تضامن الإعلامي عمرو أديب، مع المطرب محمد فؤاد، عقب حملة الهجوم الشرسة التي تعرض لها بسبب التصريحات التي أدلى بها خلال حفله بالسعودية.

عمرو أديب: اللي اتعمل في محمد فؤاد من امبارح للنهارده غير طبيعي

حيث قال أديب، خلال حلقة أمس من برنامجه “الحكاية” الذي يعرض عبر قناة “MBC مصر” تعليقًا على الهجوم الذي تعرض له المطرب الشهير من الجمهور المصري: “الراجل كان سعيد.. كان مبسوط.. انت بتتكلم على إيه أغاني م التمانينات.. الناس سعيدة بيه فرحانة بيه احتفال فنان مصري جميل كل حاجة حلوة وجميلة.. كل حاجة حلوة وجميلة خلاص خليني بقى أقولكم على لغز أنا مش فاهمه.. بجد مش فاهمه وهتكلم بكل صراحة.. كل ما نروح حفلة في الرياض قبل ما نمشي م الرياض.. تلقى فيه هجوم عنيف جدًا على الفنان اللي موجود.. مش حصلت مرة حصلت 20 مرة.. لدرجة إن دايمًا وإحنا واقفين هناك قاعدين مستنيين طب هيحصل إيه.. هتيجي فين.. الضربة جاية فين؟”.

وأضاف: “الحفلة ناجحة ومكسرة الدنيا وشيء عظيم وشيء جميل ومتذاعة على 7.. 8 قنوات و4.. 5 إذاعات والناس سعيدة ومبسوطة تيجي تبص فجأة ع السوشيال ميديا هجوم فظيع.. هجوم مريع.. محدش عدى م الحكاية دي.. قول أي اسم.. محدش بيروح يغني في الرياض غير وهو راكب الطيارة على ما يوصل تاني يوم الصبح يكون اتقطع حتت”.

وتابع: “طب يا جماعة الحفلة مش عاجباكم؟ لأ.. طب الراجل غنى وحش؟ لأ.. طب المسرح مثلًا المزيكا هندسة الصوت؟ لأ.. يتساب الحفلة كلها يا جماعة.. يتساب التعب ويتساب المجهود ويمسكوا في كلمة مش جملة.. كلمة.. وتقعد تتلف دواير دواير ناس ورا ناس ورا ناس وشتيمة وهجوم غير طبيعي.. طب ده ابن بلدك.. ده الفنان حبيبك.. الراجل ده غنى انت بتموت فيه.. يا سيدي طلع قال كلمة زيادة شوية.. خانه التعبير.. ما قالش التعبير صح.. اللي اتعمل في محمد فؤاد من امبارح للنهارده غير طبيعي.. واللي قبليه واللي هي قبليه واللي هو قبليه واللي هما قبليه.. فرقة حصل فيها كده.. مطرب حصل فيها كده.. ميجا ستار حصل فيه كده.. سوبر ستار حصل فيه كده.. قيمة وقامة حصل فيه كده ما نلحقش نخرج م المسرح يا سادة غير وتلقى هجوم رهيب جدًا”.

وأستطرد: “طيب.. اللي كانوا بيغنوا امبارح دول جايين من كوكب إيه؟ جايين من كوكب مصر.. مغنيين مصريين رافعين راسك أنا ببقى واقف والله فخور.. أنا ماشي كده فلانة بتغني فلان بيغني ده ويجز.. دول كايروكي.. العازفين دول الـ 130 عازف دول كلهم مصريين.. أنا مصر.. وماشي فخور جدًا وأنا ماشي في الرياض أو جدة سعيد.. إلا المصريين أو بعض المصريين بيكسروا في الناس دي.. ليه؟ عمري ما فهمت السبب.. الناس دي بتروح دبي.. بتروح الكويت.. بتروح تركيا.. في مطربين بيروحوا كل الحتت دي ولا حد بيقولهم حاجة.. ولا حد بيقطع فيهم.. إنما عندما تكون في الرياض توقع بقى إن بعض الحفلة ما تخلص تتعمل البرتيتا وتتعمل الحفلة.. طب يا جماعة ده راجل مغني.. كلمني ع الغنا بتاعه.. كلمني عن أدائه.. كلمني عن مزيكته.. كلمني عن المسرح.. وأنا فاكر إن هي دي الحفلة.. لأ الحفلة فيها حاجة تانية.. مطربات اتجابوا الأرض.. مفيش.. طب ده لمصلحة مين؟”.

وأردفت: “الراجل حس إن فيه ترحيب بيه أوي.. حس إن الناس متفاعلة معاه جدًا بقاله كتير ما عملش حفلات لايف ناجحة مليانة كده.. قالهم كلمتين حلوين.. حصل إيه يعني.. حصل إيه في التاريخ.. حصل إيه في الجغرافيا.. ليه بنعمل كده في ولادنا؟!”.