كشفت الفنانة الجميلة أمل رزق، عن إمكانية تفكيرها اعتزال العمل بالتمثيل، وأشارت بأنها إنسانة طبيعية ولم تفكر في الإبتعاد عن الوسط الفني، وتحدثت أيضاً عن زواجها من منتج مشهور في الصغر وكان من السهل عليها أن تُصبح نجمة مشهورة.
أمل رزق: «كان ممكن أكون بطلة وأنا صغيرة ولكني رفضت وندمت ولو رجع بيا الزمن تاني هعملها»
وأكدت الفنانة، خلال تصريحات لها مع القاهرة 24:ـ “أنا طول عمري متصالحة مع نفسي وبحب الواقعية جداً، وكمان اشتغلت مع أكبر مخرجين في مصر والوطن العربي منذ بداياتي، ورانيا فريد شوقي ومنى زكي دفعتي بالمعهد”.
وواصلت أمل:ـ “أنا اتجوزت من منتج كبير، وكان سهل عليا أوي أكون بطلة من وأنا عندي 17 سنة، ولكني مفكرتش أستغل الموضوع ده لصالحي، وحقيقي غلطت وندمانة ولو الزمن عاد بيا مرة تانية كنت هعمل بطولات وشهرة من صغري، وده علشان بسيب بصمة مع أي شخص وأي مُمثل وأي مخرج، واللي بيشتغل معايا بسنده”.
وعن اعتزالها العمل بالفن وابتعادها عن التمثيل، ردت:ـ “مفكرتش خالص في الموضوع ده، ومهما حصل مش ممكن أعتزل الفن، وده علشان أنا محبوبة وأدواري معروفة لدى الجمهور، وأغلب الجمهور بيقول عليا الفنانة المُحترمة.. مش عاوزة حاجة أكتر من كده”.
وجديراً بالذكر، بأن الفنانة أمل رزق سبق وتحدثت عن خطوطها الحمراء بالتمثيل، وأشارت خلال تصريحاتها مع القاهرة 24:ـ “برفض التلامس تماماً والأدوار الجريئة، وده علشان مش حابة أولادي يشوفوني بهذا المنظر، وعلى فكرة أغلب الأعمال الفنية اللي بتتعرض عليا دلوقتي لا تحتوي على أي مشاهد جريئة أو خادشة”.
وسبق وتحدثت الفنانة، خلال تصريحات لها مع القاهرة 24، بأنها قد تتعرض للإكتئاب الأمر الذي قد يصل بها إلى الموت، في حال ابتعادها عن مجال التمثيل.
