وجهت الإعلامية سهير جودة، رسالة نارية لابنة المطرب إيمان البحر درويش، بعد نشرها صورة تكشف مرضه.
حيث قالت خلال حلقة أمس من برنامجها “الستات” الذي تقدمه برفقة الإعلامية مفيدة شيحة، والذي يعرض عبر قناة “النهار”: “صورة إيمان البحر درويش بنته هي اللي حطتها.. دي صورة ما ينفعش المتاجرة في المرض أبدًا.. يعني ما ينفعش.. المرض والضعف عورة.. والمتاجرة بهم جريمة.. يعني ما ينفعش حتى لو أنا من أقرب الأقربين إن أنا أحط هذه الصورة.. هي ممكن تبقى مش موفقة ممكن تبقى تحت ضغط نفسي مش عايزين نجلدها كفاية اللي هي فيه ولكن بنرجو أي حد يحذف الصورة من عنده ما يشيرهاش تقف عنده لإن دي عورات مينفعش إن إحنا نكشف عورات الناس”.
وفي السياق ذاته قالت الإعلامية مفيدة شيحة: “فكرة إن أنا أتكلم عن الصورة كل الناس تخطت إنها تتكلم في دي.. مش ده الشكل اللي إحنا متعودين عليه إن إحنا نشوف فيه إيمان البحر درويش.. وأعتقد ناس كتيرة زعلت من بنته إن هي شيرت الصورة لإن إحنا كنا حابين تفضل حتى لو ذكرى.. ذكرى إيمان البحر درويش بصحته وبشكله وبشياكته وبجماله”.
وأضافت: “اللي أنا متوقفة عنده إن لو فيه ناس كتيرة قالوا ليه هي أخدت الصورة دي اللي إحنا عرفناه إن الفنان إيمان البحر درويش بيعاني من جلطة في المخ وغيبوبة كاملة فأعتقد إن ده كان السبب.. هاخد عذر اللي خلى بنته إنها نزلت ده عشان تاخد المساعدة أو تطلب الدعاء ليه أو تطلب طلب إن إحنا نحاول نلحق والدها لسبب ما.. أكيد هي بنته وأكيد هي قلبها على أبوها بغض النظر عن الصورة كل المعلومات اللي عندنا حاليًا بتقول إن الفنان إيمان البحر درويش مريض.. وإن جلطة في المخ شيء مش سهل وإن غيبوبة كاملة واضح إن هي مخلياه بالمنظر والصورة اللي إحنا شوفناها دي”.
