“بعد نجاحها بـ موضوع عائلي وأزمة منتصف العمر”.. رنا رئيس: «كنت محظوظة إن المسلسلين إتعرضوا عليا ورا بعض»
كشفت الفنانة الجميلة رنا رئيس، كواليس من حياتها الفنية وتحدثت عن مجموعة من أعمالها خلال مسيرتها الفنية، وأشارت بأن قصة إنطلاقها بعالم الفن والشهرة جاءت عن طريق الصدفة، ودون مساعدة أحد أو بواسطة على حسب ما قالته.
وأكدت الفنانة، خلال لقائها بالإعلامي معتز الدمرداش، والذي يقوم بتقدم برنامج “ضيفي”، والمُذاع عبر شاشة “الشرق للأخبار”، بأنها حققت الكثير من النجاح بعد المشاركة بـ “أزمة منتصف العمر، وموضوع عائلي”، معلقة: “بجد كنت محظوظة، وبحمد ربنا إن المسلسلين دول إتعرضوا عليا ورا بعض على طول”.
وواصلت رنا: “وحقيقي حظي كان حلو إن أزمة منتصف العمر كان عليه جدال كبير، ونجاحه تخطى كل التوقعات، وكان دوري فيه مختلف جداً عن دوري بـ موضوع عائلي، ويمكن يكون ده كان تحدي كبير بالنسبة ليا، وده علشان أنا كنت لسه طالعة من دور البنت الكيوت الطيبة للبنت اللي بتغير على جوزها بشكل جنوني، وظهرت بشكل تاني خالص”.
وأعربت الفنانة، عن بالغ سعادتها بعد خطواتها الثابتة التي تخطوها نحو النجاح خلال مسيرتها الفنية، موضحة: “مقدرش أقول غير إن ده توفيق من عند ربنا.. كل اللي بعمله إني كنت بسعى وأجتهد وربنا هو اللي بيرزقني، وكمان بحلم وبصدق الحلم وربنا يكرمني بيه، وبجد أنا شخصية صبورة أوي ودايما بتقبل النقد الوحش قبل الحلو”.
وأضافت رنا: “وبخاف أوي من النقد الحلو الزايد، وده علشان بعتبره مجاملة، ومفيش في الدنيا كلها دلوقتي بني آدم كامل ومن غير عيوب، وبالذات في مجال الفن، وأغلب النقد اللي بيجيلي من أشخاص بتنتقدني كإنسانة مش كفنانة بيزعلني يومين والموضوع بيخلص”.
وتحدثت الفنانة رنا، عن بدايتها الفنية وأنها دخلت عالم الفن بعيداً عن المساعدات والواسطة، مشيرة: “أشتغلت في البداية في الإعلانات وكاستنج لمسلسلات، وده بالرغم من إن والدتي إشتغلت في المجال ده شوية.. كانت بتشتغل ميكب أرتيسيت، ولكن مكنش ليها دور خالص إني أشتغل بمجال التمثيل”.
