حلت الفنانة والراقصة الاستعراضية لوسي، ضيفة على الإعلامية لميس الحديدي، في حلقة أمس الثلاثاء، من برنامجها “كلمة أخيرة” الذي يعرض عبر قناة “ONE”.
لوسي: اضطريت أرقص عشان الظروف.. وربنا قالي تعالي انتي ضحيتي وأنا بديكي خدي بقى
وتحدثت لوسي، خلال الحلقة عن حبها للرقص والباليه، والظروف الصعبة التي تعرضت لها واضطرتها لدخول مجال الرقص الشرقي، حيث قالت: “الظروف كان لازم حد يشتغل.. والدي كان في المستشفى.. وانتي عارفة برضه حتة ده بيحب دي والأهل هنا مش راضيين بالجوازة والأطفال هما اللي بيشيلوا الليلة على دماغهم”.
وأضافت: “وأنا كنت فكوكة كده وشقية فقولت الله طب وإيه المشكلة يعني وأنا بحب الرقص وبحترمه وبشوفه في التليفزيون وبشوف الباليه واتعلمت أصوله الخطوات في معهد الباليه ومن مصريات ومن روسيات بس كان عندي أستاذ ابتسام هي تقولي لو تهتمي يا لوسي.. فأنا أقولها انتوا عايزين أعمل الحركة كده بس أنا عايزة أعملها كده.. أكبر مصمم باليه في أمريكا بيجيب المزيكا ويجيب الكرو بتاعه ويقول لكل واحد طلع ياخد من كل واحد أحسن ما عنده من إحساس في حركة ويعشقها في التشكيلة اللي هو بيعملها.. إحساسك بالحركة مهم جدًا”.
وتابعت: “لقيت إن السكة أقرب في الأفراح وكده وللظروف اللي بقول لحضرتك عليها وتقريبًا أنا حكيتها كتير أوي ومش خجلانة منها بالعكس أنا ربنا قالي تعالي انتي ضحيتي وأنا بديكي خدي بقى.. اسم كويس أعمال أنا وابني وجوزي وأهلي فخورين بيها وكإنسانة أنا فخورة بنفسي جدًا وبحب أوي إنسانيتي مع الناس وبحب طيبتي مش خجلانة منها ساعات بيعتبروني هبلة وعبيطة أه والله العظيم.. لما تطبطبي عليا خلاص خلصت الحكاية.. أنا عصبيتي من دقيقتين لخمس دقايق”.
الجدير بالذكر أن الفنانة لوسي، يعرض لها حاليًا مسرحية “الحفيد” على خشبة المسرح القومي.
“الحفيد” بطولة: لوسي، وتامر فرج، وعبد الباري سعد، ورنا خطاب، وعابد عناني، ونشوى علي، من تأليف الأديب الكبير عبد الحميد جودة السحار، وإعداد وإخراج: يوسف المنصور.
