“باخد أدوية نفسية من 30 سنة”.. غادة عبدالرازق عن ذهابها لـ طبيب نفسي: «كنت محتاجة لحد أتكلم معاه»
أثارت الفنانة غادة عبدالرازق، الكثير من الجدل خلال الساعات القليلة الماضية، بعدما كشفت عن أنها ذهبت لطبيب نفسي، وأشارت بأنه دكتور كبير ومعروف، وتحدث أيضاً عن أنها تزوجت بسن مبكر بهدف الخروج من المنزل بسبب القيود المفروضة عليها.
صور مجمعة للفنانة غادة عبدالرازق من أعمالها الفنية، تم تعديلهم ودمجهم بواسطة نجوم مصرية.
وأكدت الفنانة، خلال لقائها بالإعلامية منى الشاذلي، والتي تقوم بتقديم برنامج “معكم”، والمُذاع عبر شاشة “on”، مشيرة: “كان لازم أروح لطبيب نفسي، وده علشان كنت عاوزه اتكلم مع حد، والدكتور ده كبير واسمه معروف، وأنا باخد أدوية نفسية من حوالي 30 سنة”.
وواصلت غادة عبدالرازق: “وأنا ماشية من عند الدكتور ده قلت له إنت عاوز حد يعالجك، وكتب ليا على أدوية ولما أخدتها دخلت في انتكاسة، وكنت عاوز أعمل حاجة مش كويسة في نفسي وأرتكب جريمة، ولكن في النهاية بحمد ربنا على كل شئ”.
وحينما سؤلت الفنانة عن سبب زواجها مبكراً، ردت: “كان عندي عقدة إني أخرج براحتي، وكنت بشوف أختي يسرية بتخرج مع خطيبها، ووالدي كان قافل عليا أوي، وأنا ساعتها كان عندي 12 سنة ويسرية كانت بتدرس في الجامعة، وبجد كان نفسي أشوف الديسكو”.
وحينما سؤلت غادة، عن أن زواجها جاء بطريقة زواج الصالونات، علقت: “نص القصة كان حب والنص التاني كان الهدف منه الخروج من البيت بأي طريقة، ووالد بنتي روتانا كان ضمن شلة أختي يسرية بـ الجامعة، وهو شافني في عيد ميلاد وقال هى دي اللي أنا عاوزها ومش هسيبها، وبصراحة أنا ما صدقت وقفشت في الكلمة”.
وأضافت الفنانة: “وروتانا إتولدت في مصر ولكن والدها سعودي، ولما إتجوزنا سافرت معاه على جدة وعشت معاه هناك 5 سنين، وماما كانت بتيجي كل فترة علشان تزورني وتطمئن عليا”.
