قامت الإعلامية ياسمين عز، بتوجيه بعض النصائح للسيدات بمناسبة حلول عيد الأضحى المبارك، وأشارت إلى أن أجازة العيد ليست للسيدات وإنما للرجال حتى ترتاح من تعب العمل.
ياسمين عز للسيدات: «بلاش خناقة الجردل والحلة مع حماتك في أول يوم العيد»
وأكدت الإعلامية، أثناء تقديمها لبرنامجها “كلام الناس”، والمُذاع عبر فضائية “mbc مصر”،:ـ “عيد سعيد عليكي وعلى فرعونك الصغير، وحابة أقولك حاجة مهمة، وهى إن أسبوع العيد مش علشانك ده علشان جوزك يرتاح من تعب الشغل، وإنتي مريحة طول العام وخدتي أجازة في العيد الصغير، والمفروض بقا إنك تيجي على نفسك اليومين دول شوية، وأكيد النتيجة هتكون رائعة بالنسبة ليكي، ونضفي البيت علشان الراجل يلاقيه شمعه وفله، ولو عندك وقت فاضي اشتري 2 كيلو مُنبار وحطيهم في الفريزر علشان تحمريهم لجوزك في العيد”.
وواصلت:ـ “وحابة أقولك خلي بالك من دوشة القرود الصغيرين، وده علشان فرعونك بيكون عاوز هدوء وكتير من المشاكل والخلافات اللي حصلت بسبب الموضوع ده، وياريت تحضري الأكل لجوزك من بدري بدل ما يروح ياكل في حتة تانية، وحضري مُمبارك وأكلك الجميل علشان جوزك لما يطلب حاجة يلاقيها”.
وقامت ياسمين، بتوجيه نصيحة للزوجة بخصوص شراء الرقاق قائلة:ـ “ياريت تجيبي الرقاق الفلاحي، وبلاش موضوع الرقاق بتاع اليومين دول اللي بيجي من السوبر ماركت، وده علشان الرقاق الفلاحي لما تسقيه مش بيبوش ولكن التاني بيبوش بسرعة”.
وأضافت الإعلامية:ـ “وبلاش خناقة الجردل والحلة بتاعة أول يوم العيد، واللي هى بتكون مع حماتك واخوات جوزك الغزلات بسبب مين هياخد إيه من الأضحية، وكل واحدة بتكون ماسكة جردل أو حلة، ولكن مفيش حد له الحق يمسك الحلة غير حماتك، والمفروض هى اللي تاخد المُمبار وعرق الفلتو والمخ، وتاخد كل اللي هى عاوزاه.. بتتخانقي مع جوزك ليه؟، هى هتاخد الحاجات دي وتجهزها ليكي ولجوزك”.
وأنهت حديثها:ـ “كام بيت بيحصل فيه خناقات بين الحماة والزوجة، وده بالذات في أول يوم العيد واللي بيتحول لنكد وهم وحزن، وفي الآخر كله بياكل ويشبع واللمة بتكون ليها شكل تاني، واللي عاوز حاجة ياخدها خليكي كريمة وكويسة وكبيرة البيت، وفي الأول والآخر نفسك الحلو هيطلع في كل حاجة”.
