تغزلت الإعلامية ياسمين عز، في حلقة أمس الأحد من برنامجها “كلام الناس” الذي يعرض عبر قناة “MBC مصر” في الزوج الصيدلي.
ياسمين عز: الزوج الصيدلي عامل زي المرهم وعنده قدرة خارقة لفك شفرة أي مشكلة
حيث قالت: “هسألك سؤال وعايزاكي تجاوبيني عليه بصراحة فكري وبعدين جاوبيني بصراحة.. عمرك شوفتي واحدة اتجوزت صيدلي وقالتلك إنها ندمانة على الخطوة دي؟ مستحيل.. طيب عمرك سمعتيها بتقول كان يوم مالوش ملامح يوم ما اتجوزتك؟ مستحيل ده كان يوم ملامحه قمر بدر منور اتحداكي ع الهوا.. ببساطة لإنها متجوزة راجل نسمة بلسم.. صيدلي.. آية في الطيبة والأخلاق والذوق العالي الرفيع”.
وأضافت: “إحنا دايمًا كلنا بنسمع جملة إن الواحد بيكون له نصيب من اسمه.. أنا ياسمين ليا نصيب من اسمي طالعة ياسميناية.. أهو المثل ده بينطبق على أي حد إلا الصيادلة.. لإن الصيدلي مش بس بيكون له نصيب من اسمه لا.. لكن كمان له نصيب من مهنته.. تحسيه دوا كده في نفسه مرهم يطيب جروحك.. وبعدين خلي بالك الزوج الصيدلي ده فيه ميزة مش موجودة في أي راجل يعني هتلاقي الصيدلي كده عنده قدرة عجيبة وخارقة وغير مفهومة لفك شفرة أي مشكلة تضايقك أو تزعلك فبالتالي مش هيبقى محتاج يسألك مالك وانتي تقوليله ماليش”.
وتابعت: “مش محتاج يسألك إيه اللي مزعلك وانتي تقوليله ما انت لو مهتم كنت عرفت لوحدك.. خالص هو مش محتاج هو أساسًا مش هيسألك لإنه هيكون عارف انتي مالك من غير ما يسأل صيدلي يا ماما.. صيدلي ومن غير ما تقوليله هو هيشعر بقولك صيدلي”.
