كشفت الفنانة وفاء عامر، كواليس حياتها الفنية وعن الكثير من الصعوبات التي واجهتها خلال مسيرتها الفنية، وأشارت بأن العمل بالتمثيل مُتعب ويهد الحيل على حسب ما قالته.
وفاء عامر عن العمل بالفن: «التمثيل مرمطة وبيهد الحيل»
وأكدت الفنانة، أثناء استضافتها ببرنامج “الستات ما يعرفوش يكدبوا”، من تقديم “إيمان عز الدين، ومنى عبدالغني”، والمُذاع عبر فضائية “cbc”:ـ “العمل بالتمثيل مُتعب ومُمرض ويهد الحيل، ولو الواحدة فينا بتروح لطبيب نفساني علشان حاجة مضايقاها.. يبقى المفروض هتروح كل ربع ساعة للطبيب، وده بسبب الشخصيات والمشاهد اللي بتعمل لينا قشور، واللي ممكن تتسبب في حاجة اسمها زلطة عند الفنان”.
وواصلت الفنانة:ـ “وياريت اللي بيسمعوني دلوقتي يكونوا فاهمين كلامي، وبجد إحنا بنحبكم أوي، وبنحب اللي بنقدمه ليكم، فـ ياريت تكونوا رفقاء بينا، وده علشان الجمهور في أغلب الأحيان بيكون قاسي، وأنا بحب مهنة التمثيل دي وبحترمها جداً”.
وتابعت وفاء:ـ “وفي قلة من الناس غير مسؤولة بتحاول تُضر الفنان نفسياً، وده علشان تحط من معنوياته، وعلى فكرة أنا بظهر طيبة لكن أنا قوية جداً ومش بتكسر غير لربنا، وده بسبب ثقتي بنفسي وقبل كل عمل بكون عارفة إن في هدف بيصحح أوضاع غلط، أو يحسس الجمهور إننا بنعمل العمل ده ليكم وعشانكم، وده علشان معناويتكم”.
وأضافت الفنانة:ـ “وحقيقي البهدلة والتعب والمرمطة اللي بنشوفها بتخلق منا بني آدمين، ولكن للأسف الشديد كتير من الناس بتحاول تبدأ من حيث انتهى الآخرين، وده علشان الفنان منا تعب علشان يركب عربية وتلاقي عيلة أو عيل عاوز يركب العربية قبل ما تاخدها، وإحنا بنتعب أوي في شغلتنا لأن في ناس في عز الشتا بتكون متغطية وإحنا تحت المطر، وفي ناس بتكون لابسة تقيل وإحنا لابسين صيفي علشان المشهد عاوز كده”.
