“معنديش منتج يساندني ولا زوج يصرف عليا عشان أكون نجمة صف أول”.. سهام جلال: «ياسمين صبري لقت حد يساعدها ونيللي كريم مكنتش موهوبة في البداية»
كشفت الفنانة الجميلة سهام جلال، كواليس من حياتها الفنية، وأكدت بأنها تستحق مكانة أفضل بين نجمات الصف الأول، ولكن الظروف المحيطة بها لم تُساعدها حتى تتمكن من الوصول إلى المكانة التي تستحقها بمجال الفن.
صور مجمعة للفنانة سهام جلال من موقع "سيدتي"، وصورة للفنانة نيللي كريم من موقع "صدى البلد"، وصورة للفنانة ياسمين صبري من بوابة "أخبار اليوم"، تم تعديلهم ودمجهم بواسطة نجوم مصرية.
وقالت الفنانة، أثناء مداخلة هاتفية مع الإعلامية نهال طايل، والتي تقوم بتقديم برنامج “تفاصيل”، والمُذاع عبر شاشة “صدى البلد 2”: “الحظ كان حليف فنانات كتير علشان يكونوا موجودين بقوة داخل الوسط الفني، وده طبعاً زي الفنانة ياسمين صبري، ودي أكيد مش النموذج الوحيد، وفي فنانين لم يكونوا بنفس القوة التي عليها في الوقت الحالي، وده زي الفنان أحمد عز”.
وواصلت سهام جلال: “ولما تجيلك فرصة وتلاقي حد يعمل منك نجمة يبقى خلاص حققتي اللي إنتي عاوزاه ونفسك فيه، ولما واحدة منا تطلع الصف الأول مش هتلاقي حد يشيلها منه أبداً، وأنا للأسف مكنش عندي منتج في ضهري يسندني ويقدمني لأدوار البطولة المُطلقة، أو معنديش زوج يصرف عليا علشان أكون بطلة، وده بالرغم من إني أستحقها عن جدارة”.
وأوضحت الفنانة، بأن شركة “العدل جروب” كانت السبب الأساسي في صناعة نجومية الفنانة نيللي كريم، على الرغم من أنها لم تكن بنفس الموهبة في بداية حياتها الفنية، وأن أي فنان لا يستطيع أن يستغل مثل هذه الفرصة، فهو إنسان يتسم بالغباء.
وأنهت سهام حديثها: “وحقيقي بتمنى من ربنا إن الفنان أشرف زكي ينظر لينا بعين الرأفة والحكمة، ومفيش جملة (الدور بينادي على صاحبة)، وده لأنها جملة مش لطيفة وعيب ومينفعش خالص إنها تتقال، وده علشان في حاجة موجودة اسمها كاستينج أو الدور مناسب لهذا الفنان”.
