شمس البارودي تدافع عن زوجها: حسن يوسف عابد وزاهد ومتيم بالروحانيات.. وحاسبوا أنفسكم قبل أن تحاسبوا الخلق

دافعت الفنانة المعتزلة شمس البارودي، عن زوجها الفنان الكبير حسن يوسف، بعد الانتقادات التي تعرض لها على خلفية التصريحات التي أدلى بها مؤخرًا.

حيث قالت شمس، في تصريحات صحفية: “الحوار اتفهم بشكل خاطئ والموضوع كان مجرد دعابة ومزحة فقط عشان يضحك الجمهور ويعمل جو من المرح والبهجة”.

وأضافت: “وحسن يوسف ما كانش يتوقع الرد العنيف ده.. وللأسف فيه بعض التعليقات المريضة اللي ما تعرفش طبيعة حسن.. هو دايمًا بيحب الضحك والهزار.. ولولا صداقته وحب لتامر عبد المنعم والمخرج عادل عوض ابن صديقه الفنان الراحل محمد عوض ما كانش راح ولا جاملهم في الجلسة دي”.

وتابعت: “ما كانش مقصود من اللي قاله التريند خالص.. ولا إنه يشغل الناس عن اللي بياعنوا منه زي ما البعض قال.. إحنا كلنا هنقف قدام ربنا وكل واحد هيعرف قدره عند ربنا.. وانتوا ما تعرفوش حسن يوسف كويس.. الراجل العابد الزاهد المتيم بالروحانيات.. اللي بيصلي فرائض ربنا وبيقيم الليل وبيرتل القرآن يوميًا.. اللي بعيد عن الكدب والرياء والنفاق”.

ووجهت شمس، رسالة لمنتقديه قائلة: “حاسبوا أنفسكم قبل أن تحاسبوا الخلق.. أنا مش بدافع عنه بس لعشرتي له أقدر أقول إنه مؤمن يخشى الله في كل سكناته.. وهو كان متصور إنه جلسه مع ولاده فحب يفكهم ويبسط الجلسة.. لإنه بطبيعته بشوش وبيحب إن الكل يبتسم وفيه ناس نجحت في استغلال طيبته ونيته الصافية وظنوا سوء في اللي قاله ونصبوا له محكمة.. استعدوا بقى كلكم لمحكمة الآخرة”.