حل المنتج جمال العدل، ضيفًا على الإعلامية بسمة وهبة، مقدمة برنامج “العرافة” الذي يذاع عبر قناة “المحور” الفضائية.
جمال العدل مدافعًا عن ريهام حجاج: فاتن حمامة شخصيًا قالت عليها إنها ممثلة شاطرة
وكشف العدل، عن رأيه في الفنانة ريهام حجاج، الذي أنتج له مسلسله الجديد “يوتيرن” والذي يعرض خلال شهر رمضان الجاري.
وقال العدل: “ريهام مش أول مرة أنتج لها كانت معايا في سجن النسا كانت بطلة من بطلات المسلسل وهي ممثلة شاطرة جدًا وأنا بحس إنها ظُلمت في التجارب السابقة اللي كانت قبل كده وأنا رهاني عليها كان السنة دي ومبسوط لها ومبسوط منها أكتر من المسلسلين التانيين لأن كان كل الناس بيخوفني”.
وأضاف العدل: “أنا شوفتها قبل كده وأنا لما اشتغلت معايا الست كانت ست هايلة جدًا وشاطرة ومذاكرة دورها منتظمة جدًا وملتزمة شبه يسرا شبه نيللي شبه الشغلانة اللي إحنا اتربينا عليها والحمد لله عملنا حاجة مع بعض كويسة جدًا وناجحة جدًا وده شيء سعدني فوق الوصف لأن كان رهاني عليها زي ما أنا مقدر إنها ممثلة شاطرة فاتن حمامة شخصيًا قالت عليها إنها ممثلة شاطرة فأنا رهاني طلع مظبوط والحمد لله مكسرة الدنيا السنة دي أهي”.
وعن التزام ريهام حجاج، قال العدل: “أنا حسيت إنها كمان يا عيني جت على روحها أكتر من اللازم عشان تمحي عن نفسها الفكرة اللي كانت الناس بتقولها عليها أنا شايف إنها ست ملتزمة جدًا زيها زي يسرا زي نيللي وجايز أكتر شوية عشان السبب اللي أنا قولته إنما هي ممثلة شاطرة ولو مش شاطرة مكنتش هنتج لها عمري ما كنت هنتج لها لأن فيه ناس أهم منها كان ممكن يبقى بينا مشاريع وما عملتهاش”.
“يوتيرن” بطولة: ريهام حجاج، وتوفيق عبد الحميد، وعبير صبري، وكريم قاسم، وصفاء الطوخي، ومحمد الكيلاني، ومحمود حجازي، وعبير منير، ونورهان، وهلا السعيد، وأيمن القيسوني، ومحمود حافظ، ونانسي صلاح، وعصام السقا، وسامية عاطف، وهنا جاد، من تأليف: أيمن سلامة، وإخراج: سامح عبد العزيز.
