“كنت متمسكة بخيط أمل انقطع مع آخر نفس لـ أحمد”.. رشا سامي العدل تكشف تفاصيل اللحظات الأخيرة في حياة شقيقها الراحل

كشفت رشا ابنة الراحل سامي العدل، تفاصيل اللحظات الأخيرة من حياة شقيقها المخرج أحمد سامي العدل، والذي رحل عن عالمنا صباح أمس السبت، عن عمر يناهز الـ 35 عاماً.

وقامت رشا، بنشر صور جمعتها بشقيقها الراحل عبر حسابها الرسمي على موقع التواصل الإجتماعي “فيس بوك”، وعلقت: “ساعة الغروب كنا قاعدين مع بعض على البحر في دهب، وكنا بنعيط شوية ونضحك شوية وبنقول لبعض قد إيه والدي وحشنا، والحياة من غيره صعبة أوي ومتسواش حاجة، وفضفضنا مع بعض واتفقنا على حاجات كتيرة نعملها مع بعض”.

وواصلت ابنة سامي العدل: “وبعدها رجع على القاهرة، وكنا متواعيدن إننا نتقابل ونجتمع في لقاء قريب، وتم اللقاء بعد مكالمة هاتفية الحقي أخوكي تعبان أوي وراح على المستشفى، وبسرعة جريت على هناك ولقيته تعبان جداً ومش عارف ياخد نفسه والكلام بصعوبة بالغة، وساعتها فضلت أكلمه وأضحكه وأحاول أهون عليه تعبه شوية وأسيبه يرتاح شوية”.

وتابعت رشا: “وساعتها كنت بحاول أنقله لـ مستشفى تانية، وفجأة فقد نبض القلب لعدة ثواني أمامي، اتخضيت ولكن الأطباء طمنوني وقالوا ليا إنه كويس وزي الفل، وبعدها على طول حسيت بوجع في قلبي ولقيت نفسي بكلمه وأقوله عاوزاك تسبح وتنطق الشهادة معايا، وتفضل طول الوقت تقرأ قرآن من اللي إنت حافظة، وبمجرد ما إتلفت وهخرج أشوف قصة الإسعاف علشان أنقله لمكان تاني أفضل”.

وأضافت رشا العدل: “بصيت لقيت أطباء ومُمرضات في كل حته حواليه، ولمدة 38 دقيقة بيحاولوا ينعشوه، وأنا واقفة قدامه قلبي بيتقطع ومش عارفه أعمل له حاجة، وحاسه إن روحي هى اللي بتطلع مني، ولكني كنت مُتمسكة بخيط الأمل انقطع مع آخر نفس من احمد.. أخويا وحبيبي وروح قلبي الهادي الطيب الحنون”.

وجديراً بالذكر، بأن خالد سامي العدل شقيق الراحل أحمد أعلن خبر وفاة شقيقه، عبر حسابه الرسمي على “فيس بوك”، وكتب: “إنا لله وإنا إليه راجعون.. تُوفي إلى رحمة الله أخي وصديق عمري أحمد سامي العدل.. نسألكم الدعاء له بالرحمة والمغفرة”.