حل المطرب والملحن رامي جمال، ضيفًا على الإعلامية أسما إبراهيم، في أحدث حلقات برنامج “حبر سري” الذي يعرض عبر قناة “القاهرة والناس”.
رامي جمال: تامر عاشور أخويا.. جابلي شغل وإحنا في الكلية وكان بيقسم الـ 30 جنيه معايا
وكشف رامي، خلال الحلقة تفاصيل علاقته بصديقه المطرب والملحن تامر عاشور، حيث قال: “ده أخويا.. يعني خلي بالك دايمًا الفنانين بيتكلموا عن بعض بشكل حلو جزء كبير منها فعلًا بيبقى أحاسيس حقيقية وجزء كبير منها لإنه فعلًا محدش بياخد رزق حد بس تامر عاشور إحنا ناس خدت شقة سوا.. كلت من إيد مامته وهو كل من إيد ماماتي.. كان جنبي في السيكشن في الكلية.. أول حد وإحنا كنا مش معروفين خالص في إعدادي كلية وهو عنده 17 سنة وأنا نفس الكلام كان هو بيشتغل في مكان وأنا في الكلية مكنتش أعرف هو بيشتغل في مكان بياخد إيه فقولتله أنا عايز أشتغل عشان أصرف على نفسي فخدني في المكان ده وقسم رقم ما بيتقسمش معايا وهو كان 30 جنيه”.
وأضاف: “يعني قدر يقسم 30 جنيه.. مش عايز أكبر الموضوع أوي بس إحنا ساعتها كنا صغيرين يعني طموحنا في الآخر إن يبقى إيجار البيت موجود وإحنا بنعمل اللي بنحبه.. هو في الآخر تامر نفسيته حلوة هو بالنسبة لي عامل زي أحمد ومحمد أخويا.. يعني أنا م الناس اللي خطوة خطوة لتامر لازم أبعت وأبارك له وأفرح له من قلبي.. والله بفرح حتى لو فيه ناس بتقولي ما بتغيرش منه وأغير من إيه وأغير ليه.. إحنا في يوم من الأيام كنا بنحلم بحاجة سوا هو أول واحد وصل لها لإن هو غنى قبلي.. غنى قبلي بأربع سنين ودي كانت حاجة ممتعة بالنسبة لي لإن وصول حد بحبه لبداية الطريق إذا كان هو الـ 30 جنيه قسمهم.. فكان في دماغي لما يوصل أكتر ممكن يقربلي المشوار”.
