كشف السيناريست والمخرج محمد سامي، سر نجاح مسلسله الأخير “جعفر العمدة” الذي عرض في شهر رمضان الماضي.
محمد سامي عن "جعفر العمدة": قولت هعمل أنجح مسلسل عملته في حياتي يا إما بلاش
حيث قال سامي، خلال لقائه مع الفنانة والإعلامية الكبيرة إسعاد يونس، في أحدث حلقات برنامج “صاحبة السعادة”: “أنا المسلسل ده كان تحدي.. المسلسل ده كنت لازم فيه أعمل أكبر نجاح في حياتي.. أنا كنت داخل المسلسل ده السنة اللي قبلها أنا ما اشتغلتش والسنة دي أنا كنت داخل يا أما هعمل أهم مسلسل وأنجح مسلسل عملته في حياتي يا إما مش عايز أعمل حاجة”.
وأضاف: “في المسلسل ده أنا استعنت بصديق وهو مهاب طارق اللي كاتب معايا وأنا عملت القصة وبعدين عملنا أنا وهو السيناريو والحوار سوا.. إحنا كنا بنشتغل حوالي 12 ساعة 13 ساعة حسب ما بنشتغل بالطريقة المعتادة رقم 1 هو المسلسل نجح هذا النجاح لإن صناعته صح.. مشرف العمل على الإنتاج كنت بخاف ساعات لا يكرهني من كتر ما بزهقه.. محمد السعدي من كتر ما بزهقه بخاف لا يتضايق.. كل الناس اللي معايا في اللوكيشن”.
وتابع: “أنا بحس إن أول حاجة عشان المسلسل ينجح لازم يكون معمول بالشكل صح.. داخل بالتلاتين حلقة بتاعته بنصوره في ميعاد صح قبل رمضان.. مفيش حاجة اسمها تصوير في رمضان.. التصوير في رمضان ده أنا ما بعملوش.. أول مسلسل في حياتي كنت تابع للمنظومة صورت في رمضان اللي هو (آدم).. ده أول مسلسل وأنا صغير في سنة أولى.. من بعد مسلسل (آدم) أنا عمري في حياتي ما صورت في رمضان ده ما بعملوش.. الشغل الصح بالنظام الصح.. السكريبت مكتوب قبل التصوير بوقت كافي.. ومفيش حاجة اسمها تصوير في رمضان.. فيه قبل رمضان بشهر المخرج قاعد على المونتاج وقاعد على المزيكا وقاعد على كل التفاصيل”.
وأردف: “الفكرة بتجيلي فكرة الشخصية وابدأ أكتب شخصيات.. بتجيلي الفكرة الصغيرة الأول واحد متجوز 4 وبيدور على ابنه.. ابدأ أقول طيب مين الناس.. فين المكان بيئة المكان.. ابدأ امسك شخصية شخصية.. ازاي تكون شخصية جذابة.. ازاي يبقى فيه جذب ع الورق.. ازاي شخصية أمه زي شخصية (صفصف).. أول جملة كتبتها إن هي أم ارستقراطية شعبية سليطة اللسان طيبة القلب وكتبت على جنب نقطة ضعفها المدح لو حد مدحها هي دي نقطة ضعفها”.
واختتم حديثه قائلًا: “وأنا ماشي حاطط في اعتباراتي القفلات.. أنا إيه اللي يخليني أضرب سيزون كامل على منصة في يوم وأنا داخل مقرر اتفرج على حلقة غير القفلات.. أنا داخل مقرر القفلات مفيش حاجة بقى اسمها الحلقات طولت وقصرت.. لو الحلقة دي ساعتين ودي ربع ساعة هسيب دي ساعتين ودي ربع ساعة أنا ما بغيرش قفلات”.
