علقت الفنانة مروة عبد المنعم، على خبر اعتزال الفنانة ميرهان حسين، خلال حلولها ضيفة في أحدث حلقات برنامج “الستات” الذي تقدمه كلًا من: سهير جودة، ومفيدة شيحة، ويعرض عبر قناة “النهار”.
مروة عبد المنعم: فيه ناس داخلة التمثيل عشان الفلوس والشهرة بس.. وبرفض إن بنتي تمثل
حيث قالت: “حسيت بكل كلمة قالتها ميرهان حسين لإني عديت بنفس التجربة.. بس الفرق بيني وبينها إن أنا أضعف من قرار الاعتزال.. لإن فيه فرق بين الممثل والمبدع”.
وأضافت: “فيه ناس داخلة التمثيل عشان الفلوس والشهرة بس.. أنا ما فكرتش في الاعتزال لإني بحب التمثيل جدًا.. عملت مسرح وعملت فيديوهات على التيك توك.. لإن جوايا حالة إبداع ولازم تطلع”.
وتابعت: “أنا في مرحلة ابتلاء لو استسلمت لها هتتغلب عليا.. فعشان كده لازم أفضل أسعى طول الوقت ومش عارفة إيه سبب قلة أعمالي بس الحياة وقفت بعد قضية الخادمة اللي توفت في بيتي.. وقتها الإعلام اهتم بالقضية وما اهتمش ببراءتي نفس الاهتمام”.
وأردفت: “اتعرضت لظلم كبير.. ونظرة الناس ليا كانت وحشة أوي وما كانوش فاهمين الحكاية كويس.. ولحد دلوقتي الناس بيشتموني وبيدعوا على بنتي عشان ما يعرفوش إني بريئة”.
وعن موقفها من دخول ابنتها الوسط الفني، قالت: “مش عايزاها تدخل التمثيل لإنها مهنة متعبة جدًا نفسيًا.. وأنا بخاف عليها.. ولو الواحد في المهنة دي بعيد عن ربنا هيتعب وهيتغر بسبب الكلام الحلو والشهرة.. بس الدنيا قلابة لإن الشخص المشهور ده فجأة شخص تاني بياخد مكانه فبيتصدم”.
